DILI, 23 Maiu 2025 (TATOLI)—Sekretáriu Estadu Formasaun Profisionál no Empregu, Rogério de Araújo Mendonça, hateten probabilidade iha fulan-Outubru tinan ne’e, Sekretaria Estadu Formasaun Profisionál no Empregu (SEFOPE) sei halo rekrutamentu ba traballadór sira ne’ebé atu bá servisu iha Nova Zelándia.
Rogério dehan, daudaun ne’e, Governu Timor-Leste (TL) iha hela prosesu atu kompleta rekizitu no prepara asinatura operasionál ba programa mobilidade laborál.
“Prosesu hotu ne’ebe ita-boot sira akompaña ona iha mídia SEFOPE no mós mídia Nova Zelándia nian, iha-ne’ebá ita-boot sira haree ona katak Governu Nova Zelándia publika ona iha sira-nia portál katak TL hola-parte ona iha programa mobilidade laborál ne’ebé hanaran Recognized Seasonal Employer (RSE),” nia dehan ba jornalista iha Timor Plaza, sesta ne’e.
Notísia relevante: SEFOPE-Nova Zelándia iha ona rezultadu pozitivu atu rekruta traballadór timoroan
Nia esplika, bainhira Governu atu haruka traballadór sira hosi nasaun ida bá nasaun seluk, tenke haree uluk akordu kooperasaun nian.
“Bainhira ita haruka ita-nia traballadór sira husi nasaun ida bá nasaun seluk, signifika ita tenke haree uluk rekizitu ne’ebé iha. Tanba ne’e, Governu Nova Zelándia ho Governu TL liuhosi SEFOPE, halo hela komunikasaun ba preparasaun, asina entendimentu operasionál RSE nian, para ita iha akordu, no ita bele hahú rekruta traballadór sira,” nia esplika.
Antes ne’e, iha loron 28 Abríl 2025, Governu Nova Zelándia ofisialmente aumenta TL bá iha eskema empregadór sazonál ne’ebé RSE rekoñese, hodi loke dalan ba sidadaun TL sira atu serbisu legalmente no regularmente iha setór ortikultura sira iha Nova Zelándia.
Jornalista: Felicidade Ximenes
Editór: Xisto Freitas da Piedade
