DILI, 23 Maiu 2025 (TATOLI) – Prezidente Kámara Komérsiu no Industria (CCI-TL), Jorge Manuel Serrano hateten, konsidera proposta lei kódigu rekuperasaun no insolvénsia ne’ebé daudaun Parlamentu Nasionál halo hela diskusaun ne’e importante tebes ba setór privadu sira.
Nia hateten, lei kódigu rekuperasaun no insolvénsia ne’e importante tebes no foin lalais Governu ho Parlamentu Nasionál hahú halo diskusaun nia rasik hetan konvite husi komisaun A ne’ebé trata Asuntu Justisa no Konstituisionál) ba hato’o opiniaun ruma kona-ba lei rekuperasaun no insolvensia nian
“Ha’u hanoin ne’e lei foun ida importante tebetebes ba vida ekonómiku rai ne’e ninian, ba banku sira nomós ba imprezáriu sira mós, ne’ebé ami partisipa hamutuk ho reprezentante banku sira, ajénsia internasionál lubuk ida-ne’ebé ligadu atividade ekonómiku,”Jorge Manuel Serrano, bá TATOLI, sesta ne’e.
Nia subliña, iha diskusaun CCI-TL hatama ona paresér balun atu husu ba Komisaun A atu konsidera atubele tau mós iha artigu balun.
“Tanba ha’u hanoin katak lei ne’e di’ak, ne’ebé prepara rasik husi Governu husi Ministériu Kordenador Asuntu Ekonómiku, lori ba komisaun A, ami agradese tanba bele konsidera mós Kámara Komérsiu Indústria Timor-Leste, ami partisipa ami fó ona ami-nia paresér fó ona ami-nia pontudevista haree ba lei ne’e,” nia dehan.
Nia adianta, lei rekupersaun no insolvénsia ne’e importante tebes, tanba lei foun no Timor-Leste presiza lei ida-ne’e.
Nia esplika, paresér ne’ebé sira hatama iha ne’ebá atu diskute oituan kona-ba rekoperasaun no insolvensia, rekuperasaun ne’e CCI-TL hakarak instituisaun balun ne’ebé ajuda atu haree, tanba ko’alia liu kona-ba ipóteka, garantia sira-ne’ebé mak emprezária sira fó ba banku sira, sasán sira-ne’e tenke iha klareza , tenke komisaun ida iha-ne’ebá, sira bolu komisaun sira mós sei akompaña, komisaun ida atu akompaña iha rekuperasaun no insolvénsia ne’e importante.
“Ami husu mós Kámara Komérsiu no Indústria ninia partisipasaun, atu nune’e ita bele haree sasán sira-ne’e husi parte hotuhotu, labele ema ida mak sente kondenadu mesak, ne’ebé ida-ne’e mak ami husu ba komisaun A atu tau konsiderasaun iha lei ne’e,” nia konklui.
Lembra katak, iha loron 24 Abríl 2025, Parlamentu Nasionál (PN) liuhusi Komisaun A tara Asuntu Jjustisa no Konstituisionál) no D Eekonomia no Dezenvolvimentu) konvida entidade relevante hahú diskute hodi rona sira-nia hanoin relasiona ho proposta-lei númeru 12/VI (1a) kódigu rekuperasaun no insolvénsia.
Instituisaun sira ne’ebé hola-parte iha audénsia mak Ministériu Koordenadór Asuntu Ekonómiku, Ministériu Finansa, Ministériu Komérsiu no Indústria, Ministériu Justisa.
“Lei ne’e pelumenus fó ona konfiansa ba sira atu investe, tanba sira hatene katak, iha ona serteza legál atu sira investe no sira hatene bainhira iha problema ruma karik, lei ne’e sei regulariza sira-nia situasaun rasik”, Ministru Interiór, Francisco da Costa Guterres, bainhira reprezenta Vise Primeiru-Ministru, Ministru Koordenadór asuntu Ekonómiku no Ministru Turizmu no Ambiente, ba jornalista sira hafoin audénsia iha PN.
Notisía relevante: PN no Governu hahú diskute proposta lei kódigu rekuperasaun no insolvénsia
Jornalista : Arminda Fonseca
Editór : Evaristo Soares Martins
