DILI, 26 Maiu 2025 (TATOLI)–Prezidente Repúblika, José Ramos Horta, hato’o ninia reflesaun kle’an tuir anúnsiu husi Primeiru-Ministru Malázia, YAB Dato’ Seri Anwar Ibrahim, katak Timor-Leste sei sei servisu makaas atu sai membru plenu ASEAN nian iha Simeira ASEAN ba da-47 ne’ebé marka ona ba Outubru 2025, iha Kuala Lumpur.
Notísia Relevante: PR Horta apresia Vietname apoiu Timor-Leste adere ba ASEAN
Prezidente Horta hato’o ninia apresiasaun kle’an ba líder no ofisiál ASEAN sira hotu, pasadu no prezente no mós ba líder Timor-Leste ne’ebé servisu makaas durante tinan rua ikus ne’e, iha Primeiru-Ministru, Kay Rala Xanana Gusmão nia lideransa.
“Parabéns, no agora ita tenke servisu makaas liután,” Prezidente Horta haktuir iha pájina Facebook pesoál ne’ebé Agência Tatoli asesu, segunda ne’e.
Iha nia sítiu pesoál, Prezidente Horta fó sai katak mehi atu tama iha ASEAN buras ona dezde tinan 1974, bainhira ho tinan 25 nia hasoru ministru Negósiu Estranjeiru indonéziu iha tempu ne’ebá, Adam Malik, iha Jakarta.
“ASEAN mehi ida dezde juñu 1974 no iha tinan 2011 bainhira nu’udar Prezidente ha’u asina karta intensaun ofisiál atu adere ba ASEAN. Ema barak iha Timor-Leste mak komprende no konkorda. Laiha ema barak iha ASEAN mak konkorda,” Horta hateten.
Nia fó hanoin katak Prezidente Indonézia iha tempu ne’ebá, Susilo Bambang Yudhoyono, nu’udar líder ida-ne’ebé apoia tomak Timor-Leste nia intensaun atu adere ba ASEAN.
Entretantu, iha ninia anúnsiu iha Simeira ASEAN ba dala 46, Primeiru-Ministru Malázia, Anwar Ibrahim, hato’o ninia apresiasaun ba parte hotu-hotu, tantu husi ASEAN nia laran no parseiru esternu sira, ne’ebé konsistentemente fó apoiu ba prosesu adezaun Timor-Leste nian. Nia bolu susesu ida-ne’e hanesan testamentu ida ba rejiaun nia espíritu solidariedade no inkluzividade nian.
“Ne’e hanesan momentu istóriku ida, la’ós de’it ba Timor-Leste, maibé mós ba família tomak ASEAN nian. Viajen Timor-Leste nian ba adezaun tomak reflete ami nia vizaun koletiva ba ASEAN ida ne’ebé unidu, koezivu no haree ba oin”, Anwar hatete.
Ho anúnsiu ida-ne’e, Timor-Leste sei kompleta etapa finál husi nia roteiru adezaun ba ASEAN nian dezde hetan estatutu observadór iha tinan 2022.
Desizaun ne’e mós marka kapítulu importante ida iha istória ASEAN nian nu’udar organizasaun rejionál ne’ebé inkluzivu no integradu ba beibeik, nune’e mós marku foun ida iha jornada diplomátika Timor-Leste nian iha rejionál.
Notísia Relevante: PR Horta otimista Timor-Leste sei adere ba ASEAN
Jornalista : Hortencio Sanchez
Editór : Cancio Ximenes
