DILI, 28 Maiu 2025 (TATOLI)—Jestór Festivál TasiFest, Luís Simões, hateten artista na’in-lima husi estranjeiru sei to’o iha Timor-Leste (TV) ho Aero Dili, atu anima populasaun iha Tasi Tolu.
“Ami konvida ona artista na’in-lima hosi rai-li’ur mai partisipa iha Festivál TasiFest ne’ebé sei akontese iha 05-07 juñu iha Tasi Tolu, maibé na’in-tolu hanesan Rui Orlando, Anji Manji, Nadia Vega mak sei to’o uluk iha Dili, iha loron 04 fulan-Juñu ho Voo Aero Dili,” Luís Simões dehan ba TATOLI, iha Farol, kuarta ne’e.
Nia dehan, enkuantu artista rua seluk hanesan Cyril mai iha loron 5 fulan-Juñu no Ricki-Lee mai iha 6 fulan-Juñu.
Festivál tinan ida-ne’e nian sei hatudu artista talentu lokál sira-ne’ebé prontu atu diverte públiku durante loron tolu ne’e no sei marka prezensa artisa internasionál Rui Orlando (kantór prinsipál no múziku angolanu, koñesidu ho múzika susesu sira hanesan “Peço Perdão” no “Te Amo Tanto”.
TasiFest 2025 la’ós de’it festivál múzika nian maibé festivál ne’e sei aprezenta mós esperiénsia multidimensionál oinoin ne’ebé imerzivu, hanesan semináriu edukasionál sira kona-ba sustentabilidade no ekonomia azúl.
Workshop interativu sira kona-ba konxiénsia ambientál, resiklajen no inovasaun kriativa. Sei iha mós interkámbiu kulturál úniku iha espasu vibrante ida, iha-ne’ebé artista internasionál no lokál sira bele fahe sira-nia koñesimentu no kriatividade.
Jornalista: Felicidade Ximenes
Editór: Xisto Freitas da Piedade
