DILI, 04 Juñu 2025 (TATOLI)-Konsellu Profesór Ensinu Sekundáriu Jerál Koléjiu São João Paulo II Bedois liuhusi konferénsia imprensa, ohin klarifika ba públiku katak eskola la halo kobransa ilegál ba estudante sira.
Hermenegildo Soares Andrade hanesan portavós hatete eskola referida iha ninia regulamentu hodi regula estudante sira. Bainhira alunu sira mak viola regra, sei simu sansaun.
Nia haktuir regulamentu eskola nia ida mak bandu estudante sira lori telemovel bá eskola. Ba kazu ne’e, responsavel eskola halo apreensaun telemovel husi estudante ida ho sansaun tinan ikus husi atividade eskolár mak entrega fila fali ba nia na’in. Maibé, atu foti hikas telefone, estudante ida ne’ebé hetan sansaun lori osan $20 hanesan troka sansaun, maibé eskola rejeita simu $20.
Ho kazu ne’e, saida mak deputada ida levanta iha plenária Parlamentu Nasionál, segunda (2-6-2025), liuhusi konferénsia imprensa, profesór Hermenegildo desmente.
Tanba levanta ona iha uma fukun, Adjuntu Diretór eskola ne’e, Zeca M. X Salsinha, husu atu hadi’a hikas eskola ne’e nia naran di’ak.
“Ami sei halo karta ba Prezidente Parlamentu atu husu deputada ne’e tenke mai klarifika, nune’e bele hadi’a ami-nia naran ida dehan halo kobransa dolar 20 ba estudante sira ne’e”, hatutan nia.
Dirijente eskola ne’e dehan iha duni sansaun ne’ebé multa $20 maibé la’os telephone. Ezemplu estudante baku malu iha li’ur no iha eskola tenke multa $20 ne’e hakerek momoos iha regulamentu eskola.
Iha fatin hanesan Gabinete Apoiu Tékniku eskola, Silvestre Soares, reforsa deklarasaun profesór Hermenegildo.
Manorin sira husi eskola ne’e husu ba deputada ne’e bainhira levanta asuntu ruma iha uma fukun presiza haree ninia impaktu ba públiku, no importante liu mak konfirma ninia verasidade antes levanta.
Jornalista : Osória Marques
Editora : Rita Almeida
