BAUKAU, 05 Juñu 2025 (TATOLI)—Bee Timor-Leste, Empreza Públika (BTL,E.P) kontinua halo melloramentu ba infraestrutura hodi garante bee-moos ba komunidade iha Baukau.
Responsavel BTL Munisípiu Baukau, Adriana Belo da Rosa, esplika atividade no programa ne’ebé BTL durante trimestrál dahuluk mak manutensaun, prezerva tanki rezervatóriu inklui ba garante operasaun hanesan distribusaun bee-moos ba komunidade iha área urbana.
“Ami garante nafatin bee-moos ba komunidade mezmu difísil atu aumenta konsumidór,” Adriana Belo da Rosa informa ba TATOLI iha Salaun Apuramentu Vila Nova, Baukau, sesta ne’e.
Adriana da Rosa haktuir katak konsumidór BTL ne’ebé rejistadu hamutuk 1.985 ne’ebé durante trimestrál dahuluk rekolla reseita husi kliente hirak-ne’e hamutuk rihun $17-resin.
Maski nune’e, Adriana argumenta sei kontinua iha planu atu aumenta konsumidór inklui aumenta kapatasaun iha bee-matan hotu no halo modernizasaun ba tanki no halo mudansa medida ba liña tranzmisaun.
“Ita nafatin asegura fasilidade ne’ebé iha hanesan tanki rezervatóriu, kanalizasaun, distribusaun no tranzmisaun,” Adriana akresenta.
Entretantu, BTL,E.P. iha jestaun distribusaun bee-moos ba komunidade iha área urbana hanesan oras rua to’o tolu ba kada bairru iha loron serbisu, enkuantu sábadu no dumingu sei distribui kada bairru diretu iha oras ida.
Jornalista: Natalino Belo
Editór: Xisto Freitas da Piedade
