DILI, 05 Juñu 2025 (TATOLI)–EVENT2 la’ós de’it organiza Festivál TasiFest hodi anima populasaun liuhusi konsertu múzika, maibé sei organiza mós semináriu pinta gratuita ba komunidade.
Artista pintura, Tomás João, relata katak sei pinta objetu natureza ne’ebé nu’udár dalan ida atu hato’o mensajen ba mundu.
“Ami realiza pinta ida-ne’e ba ajente natureza hotu-hotu ne’ebé halo sesaun formasaun hodi hato’o mensajen ne’ebé natureza hakarak hato’o ba mundu, liuhusi eventu ne’ebé sei hala’o iha Tasi Tolu, hahú iha loron 6-7 Juñu,” Tomás João dehan iha Palm Springs Hotel, kinta ne’e.
Nia informa kataka sei pinta ai-horis sira, maibé sei utiliza lixu tasi-ibun nian. “Ami sei halo kolleta balun ne’ebé sei uza iha lixu tasi-ibun nian. Primeiru, ami sei tun ba tasi-ibun no ema hotu sei foti lixu no depois ema hotu sei kolleta no lori bá uma,” nia esplika.
Aleinde ne’e, EVENT2 la’ós de’it organiza festivál múzika no pinta, maibé sei aprezenta mós esperiénsia multidimensionál oinoin ne’ebé imerzivu, hanesan semináriu edukasionál sira kona-ba sustentabilidade no ekonomia azúl, workshop interativu sira kona-ba konxiénsia ambientál, resiklajen no inovasaun kriativa, interkámbiu kulturál úniku iha espasu vibrante ida, iha-ne’ebé artista internasionál no lokál sira bele fahe sira-nia koñesimentu no kriatividade.
Jornalista: Felicidade Ximenes
Editór: Xisto Freitas da Piedade
