DILI, 04 Juñu 2025 (TATOLI)—Diretór Servisu Apoiu Diagnóstiku no Terapéutiku Hospital Nacional Guido Valadares (HNGV), Vidal de Jesus Lopes, klarifika realasiona ho informasaun ne’ebé mak espalla iha média sosiál kona-ba sala operasaun laiha hena esterilizasaun no ai-moruk anestésia, ida-ne’e falta komunikasaun entre jestaun departamentu ho família pasiente.
“HNGV atu Klarifika de’it ba públiku katak loos duni horisehik deputadu sira mós levanta kestaun ne’e iha Plenária Parlamentu Nasionál, tanba ne’e atu aproveita tempu ne’e atu klarifika ba públiku katak ida-ne’e akontese duni. Ita-nia komunikasaun jestaun internál iha departamentu ho família pasiente mak hamosu interpretasaun ne’ebé la tuir realidade,” Vidal de Jesus Lopes hateten ba jornalista sira iha kna’ar fatin, HNGV, Bidau, kuarta ne’e.
Nia dehan, ai-moruk ho hena sira-ne’e iha, maibé problema horisehik ne’e hahú husi dadeer to’o lorokraik ne’e iha pasiente 15 mak halo operasaun. Husi 15 ne’e, na’in-13 mak ho kategoria emerjénsia no rua mak kategoria eletivu. Agora, prosesu operasaun ne’e hotu-hotu tenke liuhusi prosesu naruk, la’ós fásil ne’ebé ohin deside opera kedas.
Vidal informa, nivel departamentu presiza iha komunikasaun ho família pasiente atu labele hamosu dezentendimentu.
“Realidade horisehik kalan mediku sira ba check kedas sasán no ai-moruk sira-ne’e, kompletu. Sasán uza ba sala operasaun ne’e mós kompletu, rezerva iha armazein mós nakonu hela. Kestaun komunikasaun ho jestaun nivel departamentu ne’e mak presiza hadi’a atu nune’e labele hamosu tan dezentendimentu hanesan ne’e,” nia fó hanoin.
Maibé, nia rekoñese katak kona-ba desizaun ne’ebé mak horisehik foti la implika pasiente ka ema ruma hetan konsekuénsia husi situasaun ne’e.
Jornalista: Natalino Costa
Editór: Xisto Freitas da Piedade
