DILI,07 Juñu 2025 (TATOLI)—Artista husi Indonézia, Nadia Vega, nota Timor-leste iha mundansa barak liuliu iha setór ekonomia no infraestrutura.
“Timor-Leste iha ona dezenvolvimentu iha setór oin oin no komesa iha mudansa. Ha’u mai iha Timor Leste, uluk iha 2015, liuba no ha’u haree iha mudansa ne’ebé mak barak iha ne’e no diferensia maka’as liu ida uluk. Maibe ha’u hanesan turista, no ha’u iha ne’e loron haat de’it, no ha’u haree liu de’it, no la hare barak liu. Maibé buat ne’ebé mak ha’u haree iha loron hirak ne’e mak iha mudansa barak iha setór ekonomia no infraestrutura,”Nadia Vega informa ba TATOLI bainhira sai oradór iha semináriu kona-ba ekonomia azúl no prátika matak ba Timor Leste ida sustentavél, iha Tasi Tolu, Dili, ohin.
Nia hateten, hanesan artista hakarak aprende liután ho kolega Timoroan sira, ne’ebé iha interese ba sensibilidade klásika, maibé hakarak aprrende liután hodi nune’e bele apoia ba TasiFest.
Iha fatin hanesan, Koordenadór ba Semináriu eventu Tasifest, Gilerme Albano de Jesus, hatete objetivu husi semináriu ne’e atu fó informasaun balun kona-ba meiu ambiente liuliu ba Polítika implementasaun Ekonomia azúl ne’ebé daudaun ne’e joven sira barak mak seidauk koñese.
“Estudate sira barak seidauk komprinde di’ak kona-ba oinsá atu kuidadu ambiente dalabarak ita nia rai nakonu ho plástiku hanesan ita-nia tasi rasik, agua mamuk barak tebes ne’ebé mak ema so’e iha ne’ebá, nune’e fo’er iha mota tun hotu ba tasi,entaun difikuldade boot ba ita nia tasi liu liu ikan sira ne’ebé mak iha tasi laran,”nia esplika.
Ho preokupasaun ne’e, nia dehan semináriu ne’e atu fahe informasaun ba ema hotu liuliu ba ekipa Tasifest mak fó formasaun ba joven sira atu transforma informsaun ba ema sira ne’ebé mak presiza atu hatene duni no obrigatóriu atu joven sira hatene oinsá atu perserva tasi liuliu ambiente tasi no rai rasik.
Husi semináriu ne’e Tasifest konvida oradór sira husi BNU, empreza Santos no artista internsionál husi Indonézia mak Nadia Vega ne’ebé mak fahe sira-nia esperénsia no abilidade kona-ba arte resiklajen no plástiku sira sai fali obra edukativu.
Jornalista : Felicidade Ximenes
Editór: Florencio Miranda Ximenes
