DILI, 03 Juñu 2025 (TATOLI)—Ministériu Administrasaun Estatál (MAE) no organizasaun internasionál – Heavenly Culture, Word Peace Restoration of Light (HWPL) husi Koreia Súl, Tersa ne’e, asina nota kooperasaun ho objetivu atu dezentraliza pás iha nível rejionál liuhusi setór edukasaun.
“Asina memorandu ida-ne’e atu ko’alia kona-ba asuntu pás. Akordu ida-ne’e asina barak ona ho liña ministeriál sira seluk. Nune’e, MAE hetan oportunidade tanba ita iha populasaun to’o aldeia no suku sira,” Ministru Administrasaun Estatál, Tomás do Rosário Cabral, hateten ba jornalista sira, iha salaun enkontru VIP MAE, Kaikoli.
HWPL maka hanesan organizasaun internasionál ne’ebé trata asuntu kona-ba dame internasionál hodi serbisu hapara funu no realizasaun dame sustentável iha mundu tomak.
Ministru dehan, la’ós de’it atu kria pás, maibé sei integra liuhusi edukasaun no governasaun di’ak tanba buat hirak ne’e kontribui ba pás.
“Antes ne, Prezidente Repúblika ko’alia ona aktu ida-ne’e, entaun sira mai para implementa lori prosesu sira-ne’e bá to’o baze tanba autoridade munisipál sira tutela mai iha ministériu ne’e,” Governante ne’e informa.
Notísia relevante : Horta: TL orgullu sai uma-na’in ba enkontru rejionál pasífiku C24
Organizasaun ne’e mós sei dezentraliza pás liuhusi formasaun sira iha nível audiénsia suku.
“Entaun formasaun bele ba líder komunitária sira atu dezenvolve no anunsia pás no rekonsiliasaun iha baze. Enkuantu, akordu ne’e mós laiha limitasaun maibé sei kontinua koopera to’o futuru oin mai,” nia katak.
Iha sorin seluk, Reprezentante organizasaun HWPL, Le Meng Hi, hato’o apresiasaun boot ba ema hotu ne’ebé hola parte iha serimónia ne’e.
“Partikulár hato’o ami-nia agradesimentu sinseru ba Ministru Administrasaun Estatál ne’ebé loke ona odamatan ba parseria ida-ne’e no ba diretór sira atu jere negósiu ho loloos. Ita-boot nia lideransa no kompromisu sai hanesan forsa iha istória ida-ne’e nia kotuk ba pasu oin ho dame,” nia reforsa.
Le Meng Hi, hato’o tan katak objetivu husi programa ne’e maka atu haburas valór kompreensaun, empatia no unidade iha jerasaun sira iha futuru.
“rojetu sira hanesan pintura hanesan espelu dame nian no ami lori joven sira atu kria atividade serbisu ekipa no espíritu voluntariadu. Ami mós serbisu hela ho parseiru sira mídia iha mós nia okos no hala’o hela inkorporasaun edukasaun,” nia katak.
HWPL iha Timor-Leste hetan onra atu serbisu besik ho líder no komunidade iha setór barak, ne’ebé hala’o inisiativa dame.
“Dahuluk ita serbisu ativu hela ho figura xave sira hodi promove deklarasaun pás no susesu serbisu Konsellu lideransa filiál atubele adota husi Parlamentu Nasioná nu’udar fundasaun legál ida ba pás iha setór edukasaun ita asina ona akordu ho Ministériu Ensinu Superiór no barak liu uza ho Instituisaun Ensinu Superiór 10 atu implementa dame iha edukasaun,” Reprezentante organizasaun katak.
Organizasaun internasionál ne’e sei konvida Primeiru-Ministru, Kay Rala Xanana Gusmão bá Koreia Súl hodi ko’alia kona-ba pás no estabilidade.
Jornalista : Alexandra da Costa
Editora : Julia Chatarina
