DILI, 03 Juñu 2025 (TATOLI)–Governu liuhosi Institutu Nasionál Seguransa Sosiál (INSS) hamutuk Banku Nasionál Komérsiu Timor-Leste (BNCTL-sigla portugés), sei halo pagamentu ba pensaun sosiál iha fulan-ne’e.
“Pagamentu ba pensaun sosiál iha fulan-Juñu ne’e entre loron 20 ba oin BNCTL hahú halo pagamentu”, Prezidente INSS, Arlindo Pinto, dehan ba iha nia knaar fatin, ohin.
Pensaun sosiál ne’ebé liga ba ema ho defisiénsia sira, INSS selu ona ema hamutuk 10.437, no pensaun sosiál ba ferik-katuas mak 97.359.
“Númeru ne’e ita mantein iha trimestre daruak. Ne’ebé ho osan miliaun $33.9, ida-ne’e inklui ona ho osan retroativu hosi munisípiu lima hosi fulan-Outubru to’o Novembru 2024 nian”, nia dehan.
Notísia relevante: INSS halo pagamentu ba pensaun sosiál iha 17 Marsu
Arlindo Pinto dehan tan munisípiu neen ne’ebé seidauk mak Baukau, Bobonaru, Kovalima, Ermera, Lautein, Likisá.
“Munisípiu neen seidauk ho razaun pagamentu ne’e kada tinan halo dala-ida iha trimester-ida, maibé depois halo jestaun ba orsamentu no orsamentu balun integra iha 2025 sei selu hamutuk iha períodu trimestre 2025 nian. Entaun, sei retroativu iha marsu”, nia dehan.
Antes ne’e ka inísiu tinan-2024 INSS halo pagamentu pensaun sosiál ne’ebé mak sei fahe ba kategória tolu ho nia valór pagamentu sei la hanesan bazeia ba kategoria idade mak idade 60-70 ho valór $60, idade 70-80 ho valór $80 no idade 80 ba leten ho nia valór $100.
Notísia relevante: Governu komprometidu mellora atendimentu ba pagamentu pensaun sosiál
Jornalista : Osória Marques
Editora : Rita Almeida
