Prezidente Autoridade RAEOA inaugura pré-fábrika bambuu ZEEDOA
OEKUSI, 12 Juñu (TATOLI)–Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, kinta ne’e, inaugura sentru kolesaun pré-fábrika bambuu ne’ebé maka Zona Espesiál Dezenvolvimentu Oekusi Ambeno (ZEEDOA) implementa iha Oekusi.
Serimónia inaugura Sentru kolesaun pré-fábrika bambuu iha bairru Oéfoko suku Costa sub-rejiaun Pante Makasár RAEOA ne’e ho tema ‘Estabelesimentu pré-fábrika bambuu bele sai merkadu alternativa ba povu Oekusi’
“Ita avansa ho inisiátiva ne’ebé uluk ha’u sei Ministru Ekonómia Dezenvolvimentu, ha’u mak hahú loke sentru bambuu ne’ebé ohin sai ona institutu bambuu iha Tibar, ohin inaugura iha Oekusi, tanba bambuu ne’e fó rendimentu bo’ot ba populasaun ne’ebé mak kuda bambuu depois faan fali ba Governu fasilita de’it, viveirus hodi distribui ba sidadaun sira,” Koordenadór Ezekutivu João Mendes Gonçalves, hateten iha ninia intervensaun durante serimónia inaugurasaun ohin.
Hosi atividade produsaun bambuu ne’e, tuir nia bele halo mobiliáriu hanesan meja, kadeira, ármariu, kama no seluk tan. Aleinde ne’e, bele proteze rai hosi problema erosaun hanesan rai monu ka rai-halai inklui konserva bee matan sira.
Notísia relevante:ZEEDOA kuda bambuu rihun 4 hodi prepara ba futuru estabelesimentu fábrika
Prezidente Autoridade RAEOA, Rogério Tiago Lobato orgullu ho servisu ZEEDOA nian tanba estabelese ona sentru bambuu ne’e iha Oekusi hodi transforma materiál prima sai fasilidade mobiliáriu no mós hakbi’it ekonomia agrikultór sira-nian.
“Orgullu ba polítika ZEEDOA tanba hahú ho pasu ki’ik atu prepara ba futuru dezenvolve di’akliu tan, bainhira ita atu la’o ba dalan naruk, ita tenke komesa ho pasu ida mak imi halo daudaun ne’e, parabéns ba imi hotu, kontinua promove ai-bambuu ne’e labele konsentra de’it iha Pante-Makasar maibé se bele alarga tan ba sub-rejiaun Oésilo, Pássabe no Nítibe, autoridade sei fó apoiu tomak importante mak ne’e liña koordenasaun, nune’e bele fó apoia atu fó susesu polítika ne’e,” Lobato hateten.
Iha fatin hanesan Diretór Ezekutivu Institutu Bambuu, I.P, Abílio Immanuel Almeida Barros, husu atu promove liña koordenasaun diak entre ZEEDOA, RAEOA no sentru bambuu nune’e bele garante ninia sustentabilidade ba populasaun sira iha Oekusi.
“Ba oin sei bele ita habo’ot liután ai-bambuu ninia-ejisténsia iha Oekusi tan ne’e, presiza servisu ho setór privadu sira liuliu ho CCI-TL hamutuk ho autoridade komunitária sira ita-bele forsa liután atu tau investimentu ida, nune’e bele lori bambuu bá iha kapitál no nivél rejionál,” Abílio, hateten.
Ikusliu, Xefe grupu ai-bambuu bairru Oéfoko, Albino Bobo agradese ba Intitutu Bambuu, tanba antes ne’e, forñese ona viveiru, formasaun oinsá kuda bambuu no promove bambuu hodi hakbi’it ekonomia agrikultór bambuu sira-nian.
“Ohin iha ona rezultadu apoiu ami mákina atu tesi no fera bambuu no inaugura sentru ne’e no lansa primeiru forñesimentu ai-bambu ba sentru intitutu Tibar, ami-nia grupu hahú ho orsamentu $827.00, uja hola bambuu iha suku Monemeko no planu tuirmai ami sei hola iha suku sira seluk tanba durante tinan barak ai-bambuu laiha folin, agora ohin ne’e ba oin iha ona folin,” nia hateten.
Notísia relevante:PM Xanana propoin ba ZEEDOA implementa polítika TIA
Entretantu, totál membru grupu ai-bambuu iha bairru Oefoko hamutuk na’in-12 no konsege ona forñese ai-bambu ba Institutu Bambuu Tibar 321 futun 321 husi totál ai-bambuu huun 178.
Jornalista: Abílio Elo Nini
Editór: Agapito dos Santos
