DILI, 12 Juñu 2025 (TATOLI)—Aviaun Air India 177 ho tipu Boeing 787-8 Dreamliner, ne’ebé sai husi Aeroportu Ahmedabad bá Londres, Inglaterra, hetan asidente grave iha oras meiu dia, iha zona koléjiu ensinu superiór médika sira, rezulta ema 241 mate no 1 sobrevive.
Aviaun ne’e lori pasajeiru 230, crew aviaun 12 no pilotu rua.
Aleinde ne’e, estudante universitáriu na’in-lima ne’ebé hela iha koléjiu lakon vida no ema balun hetan kanek.
“Ha’u no doutór juniór sira hetan kanek. Maizumenus doutór pos-graduasaun 30 to’o 40 hetan kanek no no estudante universitáriu balun hetan kanek grave,” haktuir Doutór husi BJ Medical College, Shyam Govind, ne’ebé sai mós sasin iha asidente ne’e.
Sita husi Ajénsia Franséz, pasajeiru ida ne’ebé sobrevive mak sidadaun inglés, Vishwashkumar Ramesh, orijen husi India, ne’ebé tuur iha kadeira 11A besik odomatan emerjénsia. Nia monu dook husi aviaun bainhira aviaun fahe an no konsege la’o bá Ambulánsia maski hetan kanek todan.
Notísia relevante : PM hato’o solidaridade ba Xina relasiona ho asidente aviaun China Eastern
Autoridade sei investiga asidente ne’e, maibé bazeia ba gravasaun ne’ebé fó sai katak aviaun hetan difikuldade semo hafoin monu no keimadu.
Ho nune’e, asidente ne’e konsideradu fatál no hanesan ba dahuluk ba aviaun ho tipu Boeing 787, hafoin introdús iha tinan 2009.
Tuir empreza aérea, pasajeiru 169 iha aviaun laran hanesan sidadaun India, Inglaterra 53, Portugal hitu no Kanadá ida.
Líder mundiál sira inklui Primeiru-Ministru India, Narendra Modi no Reinu Charles III hato’o sentidu kondelénsia profunda.
Air India no Boing sei halo investigasaun kele’an no sei ajuda família vítima.
TATOLI
