Estrutura UNITAL klarifika katak la manipula inskrisaun akadémika
DILI, 13 Juñu 2025 (TATOLI)-Portavós Universidade Orientál Timor Lorosa’e (UNITAL), Juvencio dos Santos, afirma hodi rejeita informasaun husi deputadu iha Parlamentu Nasionál katak UNITAL manipula inskrisaun akadémika.
Liuhusi konferénsia imprensa ne’ebé halo iha kampus UNITAL Bekora, ohin, portavós ne’e husu ba deputadu atu aprezenta dadus, bainhira laiha faktu, sira-nia parte husu ba deputadu ne’e atu hato’o deskulpa ba estrutura universidade.
Nia dehan UNITAL hanesan instituisaun superiór ne’ebé parseria ho Ministériu Ensinu Supérior, Siénsia no Kultura (MESSK) no Ajénsia Nasionál Avaliasaun no Akreditasaun Akadémika (ANAAA), ne’ebé regula universidade hotu hodi aposta ba kualiadade ensinu.
Reitór UNITAL, Caludino Ninas Nabais, hatete reasaun ho jestu akadémiku ne’e husu ba deputadu ne’e husu perdaun ba estrutura.
“Ami la presiza atu obriga husu deskulpa, maibé ami hakarak hanorin nia katak liuhusi instutuisaun akadémika mak forma sira, tanba deputadu balun mós gradua husi universidade ida-ne’e, entaun ida-ne’e hatudu katak iha kualidade mak alumni sira-ne’e absolve ba orgaun Estadu sira”, nia dehan.
Reitor ne’e hatutan UNITAL iha kualidade tuir padraun ANAAA. “ANAAA, regularmente halo vizita mai UNITAL no universidade hotu hodi fó sira nia konsellu no hanoin oinsá mak bele hadi’a kualidade ensinu”.
Nia aprofunda, má jestaun iha inskrisaun ba estudante foun sira hakat kedan ba semester 3 no balun laiha diploma ida-ne’e la eziste. “Sistema dijitalizasaun ne’ebe mak ensinu superiór estabelese rigorozu uituan, bainhira rejista iha sistema, signifika kompleta hotu ona dokumentu ne’ebé tama iha rekezitu mak mai iha ensinu superiór”.
Nia hatete karik iha buat balun ne’ebe kontra regra, bele hatudu faktu depois enkamina ba MESSK depois mai ko’alia sala ne’e iha parte ne’ebé.
Notísia relevante: UNITAL kontinua fasilita dosente na’in-23 ba kursu doutoramentu iha Indonézia
Jornalista : Osória Marques
Editora : Rita Almeida
