VIKEKE, 13 Juñu 2025 (TATOLI)-Prezidente Autoridade Munisípiu (PAM) Vikeke, Francisco C.S de Gonzaga Soares, apela ba autoridade lokál sira iha postu administrativu Lakluta no Osuu hodi labele sai opozisaun ba dezenvolvimentu ne’ebé implementa.
“Kuandu mosu impedimentu, dezenvolvimentu labele la’o tanba ne’e mak ha’u husu ba autoridade sira labele impede programa dezenvolvimentu sira”, PAM dehan ba TATOLI iha ninia servisu fatin, ohin, hafoin vizita postu Lakluta.
Nia husu atu akompaña prosesu implementasaun projetu sira. “Agora daudaun ne’e obra PNDS mós implementa hela iha suku haat, postu Lakluta no mós Programa Dezenvolvimentu Integradu Minisipál (PDIM) ne’ebé konstrui irrigasaun Uelafua Lakluta. Presiza autoridade sira nian akompaña obra sira-ne’e, atu finaliza hodi fó-benifisia ba ita-nia populasaun”.
Nia fó hanoin ba autoridade sira bainhira projetu sira-ne’e la’o mak mídia sira husu, tenke fó sai ba públiku atu ema bele hatene razaun saida mak obra la-la’o.
Iha fatin hanesan, administradór postu Lakluta, Pascoal Gama Martins, afirma sei kolabora no koopera ho PAM hodi tau matan ba obra sira-ne’ebé implementa iha ninia postu.
“Ami autoridade Lakluta tomak sei kolabora ho autoridade munisípiu hodi tau matan ba obra sira-nebé implementa iha postu Lakluta to’o finaliza, atu povu sente ba dezenvolvimentu”, nia realsa.
Postu Lakluta ba tinan 2025 implementa projetu PNDS iha suku haat kompostu husi Ahik ne’e reabilita estrada (estrada sirtu) gasta $25,945.13, Dilor reabilita estrada (estrada sirtu) ne’e gasta $28,746.03, Line konstrusaun bee-moos sistema gravitasaun gasta $25,945.13no Uma Tolu reabilita sistema bee bomba gasta $23,291.65. Projetu DPIM ne’ebé implementa ba konstrusaun irrigasaun Uelafua ho kustu $169,620.64 ne’ebé iha ona faze konstrusaun.
Sorumutu entre PAM Vikeke ho autoridade postu Lakluta ne’e partisipa husi funsionáriu inklui xefe suku sira.
Alende ne’e, PAM mos haktuir ninia parte introdús polítika implementasaun dezentralizasaun poder lokál ba komunidade iha postu administrativu Osuu.
“Uluk ita administradór, agora ita sa’e ona ba Prezidente Autroridade Munisipál. Maske, ita sei iha faze tranzisaun, ita prepara aan ba faze ida dezentralizasaun poder lokál bazea ba dekretu lei númeru 84/2023 ho kompetensia hanesan deskonsentrasaun poder lokál, administrasaun finansa no patrimóniu”, Francisco dehan ba TATOLI iha suku Uaguia, ohin.
Nia dehan ho esperansa 2026-2027, Vikeke bele hakat ba dezentralizasaun poder lokál hodi hasoru eleisaun kamara munisipál hodi hili prezidente autoridade no vise prezidente autoridade.
Ho nune’e nia husu ba autoridade postu Osuu sira bainhira programa dezenvolvimentu husi Governu tama postu no suku sira labele halo impedimetu.
Suku Uagia ho totál aldeia neen mak Dolibuti, Luhabere, Manulari, Uaitutumata, Uatumanutuco, totál populasaun 1153 tuir sensu populasaun 2015, suku Uagia área 18,20 km².
Notísia relevante: PAM Vikeke: Dezenvolvimentu la’o ba oin tenke zero ba violénsia-impedementu
Jornalista : Vitorino Lopes da Costa
Editora : Rita Almeida
