Portugál apoia dinámika foun husi Komunidade Luzu Aziátika
DILI, 29 juñu 2025 (TATOLI) – Embaixadora Portugál iha Timor-Leste, Maria Manuela Freitas Bairos, fó bemvindu ba realizasaun Konferénsia Komunidade Portugés Aziátika (APCC) ba dala haat iha Dili, no avalia katak forum ida-ne’e konsege kria dinámika foun iha esforsu realiza kulturál no istóriku Komunidade Luzu Aziátika ne’ebé iha tinan atus ba atus.
“Ida ne’e la’ós de’it konferénsia baibain ida, maibé mós pasu importante ida iha institusionalizasaun Asosiasaun Komunidade Luzu-Aziatika nian. Ita asiste daudaun oinsá komunidade sira husi nasaun neen to’o hitu mai hamutuk no hatudu oinsá sira mantein sira-nia patrimóniu beiala, tantu kulturál no relijiozu,” Embaixadora Manuela ba TATOLI iha Sentru Konvensaun Dili (CCD-CCD-siglaportugés) domingu ne’e.
Notisia relevante: PM Xanana: Konferénsia APCC hametin amizade-promove patrimóniu kulturál,relijiozu no linguístika
Embaixadora Manuela hatutan katak komunidade sira-ne’ebé namkari iha rejiaun sira hanesan Indonézia, Malaka, Makau, Goa, Myanmar, Sri Lanka no Tailándia, nu’udar rezultadu husi interasaun istóriku naruk entre komunidade lokál sira no esploradór portugés sira ne’ebé hela no moris ba jerasaun barak iha rejiaun ne’e.
Diplomata ne’e subliña katak inisiativa prezervasaun ne’e mai tomak husi komunidade Aziátiku rasik, enkuantu Portugál asume papél hanesan apoiante no parseiru.
Nia subliña prontidaun Portugál nian hodi sai uma-na’in ba Konferénsia Komunidade Portugés-Aziátiku ba dalima bainhira hetan konvite husi asosiasaun.
“Buat ne’ebé importante maka inisiativa ida ne’e moris no buras iha Ázia.Timor-Leste hala’o ona papél signifikativu hodi lidera no promove komunidade Luzu Aziátika. Ami prontu atu apoia no sai uma-na’in ba konferénsia tuir mai karik ida ne’e maka hakarak ne’ebé fahe,” nia hateten.
Aleinde ne’e, diplomata portugés ne’e destaka mós hanesan no diferensa kulturál ne’ebé úniku entre komunidade sira ne’e.
Nia sita hanesan sira iha dansa, múzika no selebrasaun relijioza sira hanesan Semana Santa, Santu António no devosaun ba Virjen Maria, ne’ebé indika patrimóniu ida ne’ebé fahe maibé mantein nafatin sira nia distintividade rasik.
Iha fatin hanesan, Sekretáriu Ezekutivu Komunidade Nasaun Lian Portugés, Zacarias Albano da Costa, mós fó benvindu ba perspetiva atu hala’o konferénsia tuir mai iha Portugál.
Nia konsidera, momentu ne’e sei sai hanesan oportunidade ida atu hametin kolaborasaun entre nasaun membru CPLP sira iha área kultura no istória nian.
“Konferénsia ne’e hatudu ona kbi’it estraordináriu husi solidariedade no sentidu ida hamutuk nian. Karik konferénsia ba dala 5 hala’o iha Portugal, ita sei iha espasu ida ne’ebé luan liu hodi aprofunda koperasaun no halibur fali komunidade sira iha espíritu diversidade nian”, nia hatete iha diskursu enserramentu nian.
Atividade ne’e aprezenta diskusaun, aprezentasaun kulturál no reflesaun fahe kona-ba identidade luzu-aziátiku ka portugés-aziátiku, ho partisipasaun ativa hosi foin-sa’e sira no reprezentante komunidade sira hosi nasaun oioin.
Notisia relevante: Kalbuadi Lay: APCC sai ponte kulturál-diplomátiku ba CPLP no ASEAN
Jornalista: Osoria Marques
Editór: Florencio Miranda Ximenes
