Bobonaru hahú prepara atleta atu kompete iha FND 2026

BOBONARU, 24 Agostu 2026 (TATOLI) – Autoridade Munisípiu Bobonaru realiza enkontru ho asosiasaun no federasaun desportu atu prepara no identifika atleta kualifikadu sira hodi reprezenta munisípiu iha Festivál Nasionál Desportu (FND) 2026, ne’ebé sei realiza iha Dili, entre loron 04 to’o 18 Novembru.
Sekretáriu Autoridade Munisípiu Bobonaru ba Asuntu Planeamentu no Dezenvolvimentu Integradu Munisipál, Semedo Laco Costa, hateten katak enkontru ho asosiasaun desportu sira ne’e nu’udar kontinuasaun husi enkontru entre Ministériu Juventude, Desportu, Arte no Kultura (MJDAK), ho Prezidente Autoridade Munisípiu 12, inklui RAEOA no Ataúru, iha 07 Agostu 2026.
Iha enkontru ne’e, autoridade munisipál no asosiasaun desportu sira diskute mós kona-ba modalidade desportiva 12 ne’ebé sei partisipa, inklui númeru atleta no modalidade ne’ebé munisípiu prepara ona atu kompete.
“Enkontru ohin ne’e atu koalia kona-ba preparasaun ba realizasaun Festivál Nasionál Desportu. Kestaun importante ida mak munisípiu tenke identifika atleta sira ne’ebé kualifikadu atu selesiona no partisipa iha eventu ida-ne’e”, Semedo dehan iha salaun Maria Tapó, segunda-feira ne’e.
Nia hatete katak FND 2026 la’ós responsabilidade MJDAK de’it, maibé autoridade munisipál sira mós tenke hola parte ativa, tanba eventu ne’e konsidera hanesan festa desportiva nivel aas iha Timor-Leste, ne’ebé realiza kada tinan rua dala-ida.
“Ita munisípiu sei responsabiliza ekipamentu ba atleta sira hodi treinu, depois lori atleta sira bá Dili no filafali mai. Identifika hela fatin, konsumu ne’e nasionál mak reponsabliza, depois ita-nia mak atleta sira ne’ebé idade eskola, ita sei koordena ho diretór edukasaun, diretór eskola sira para fó lisensa ba sira hodi partisipa eventu ne’e”, nia dehan.
Semedo esplika katak MJDAK husu ba kada munisípiu atu identifika atleta sira ne’ebé iha kualifikasaun no kapasidade, atu reprezenta munisípiu no iha oportunidade atu kontinua partisipa iha kompetisaun rejionál no internasionál.
“Munisípiu tenke haree no buka joven sira ne’ebé iha talentu naturál, iha suku no postu no envolve sira atu reprezenta munisípiu Bobonaru iha FND 2026”, katak.
Iha fatin hanesan, Treinadór Karate-do Munisípiu Bobonaru, António Gonçalves, dehan katak modalidade karate prepara ona atleta na’in-ualu, kompostu husi feto haat no na’in haat, atu partisipa iha FND 2026.
“Ba ami, FND foun, maibé kompetisaun la’ós buat foun, tanba ami sempre partisipa no prepara atleta. Ami la hein de’it eventu mak foin treinu, maibé ami treinu semana ida dala-tolu no bainhira iha eventu, ami prontu atu kompete”, António realsa.
Nia konsidera FND hanesan oportunidade importante atu motiva labarik no joven sira atu komprende katak desportu mós iha papel importante iha prosesu dezenvolvimentu nasionál.
Nia subliña katak Karate Timor-Leste agora tama ona iha federasaun Karate ASEAN no Federasaun Karate Mundiál (WKF), no preparasaun husi nivel munisipál importante atu harii atleta sira-nia kapasidade ba kompetisaun nivel rejionál no internasionál.
Notísia relevante: Governu promete kontinua organiza eventu festivál fronteira
“Entaun, hahú agora FND ne’e fanun labarik sira katak ita nasaun, ita mós presiza atu hola parte iha eventu rejionál no internasionál”, dehan.
Totál orsamentu ne’ebé Governu aloka ba munisípiu Bobonaru atu partisipa iha eventu ne’e hamutuk rihun $10.
Notísia relevante: Governu kria festival nasionál desportu hodi promove atividade fízika
Jornalista: Sergio da Cruz
Editora: Maria Auxiliadora

