DILI, 30 Juñu 2025 (TATOLI)–Jogu Liga Futeból Timor-Leste (LFTL) kompleta ona jornada da-haat, iha ne’ebé klube primeira divizaun hamutuk 10 ne’ebé kompete iha jogu ne’e Karketu Dili FC kontinua ukun tabela klasifikasaun provizóriu ho pontu 12.
Notísia Relevante: Abertura liga futeból TL: SLB Laulara-Karketu Dili sei doko Estádiu Manatutu
Ekipa jigante kapitál Dili ne’e kontinua lidera tabela klasifikasaun provizóriu, basa iha jogu dala-haat ekipa ne’e nunka lakon maibé manán hotu nia adversariu sira seluk.
Iha jornada primeiru ne’ebé hala’o iha Estádiu Manatutu ekipa ho simbólu manu Lakateu Dili ne’e konsege hamonu nia adversariu AD SLB Laulara ne’ebé ho simbólu manu Makikit Laulara ho rezultadu 1-0. Husi ne’e Karketu rekolla kedan pontu tolu (3) hodi lidera ona tabela klasifikasaun.
Iha jornada da-ruak, Karketu kontra nia adversáriu AS Marca FC iha Estádiu Gleno konsege manán nia adverasiu ho rezultadu 4-0, ho nune’e lori Karketu nia pontu sa’e ba neen (6).
Enkuantu iha jornada da-tolu Karketu kontra nia adversáriu AS Ponta Leste iha Estádiu Gleno, Karketu nafatin manán ho rezultadu 2-0, lori Karketu nia pontu sa’e ba sia (9).
Ikusliu iha jornada da-haat Karketu kontra nia adversáriu Portu Taibesi FC, maibé ekipa kapitál Dili ne’e nafatin hatudu nia forsa hodi manán ho rezultadu 2-0 hodi lori nia ba tur metin iha tabela klasifikasaun leten liu ho pontu 12.
Nune’e, ekipa ne’ebé okupa iha pozisaun segundu tabela klasifikasaun provijoriu mak Emmanuel FC ho pontu neen (6), Academica FC iha pozisaun da-tolu ho pontu lima (5), AS Marca iha pozisaun da-haat ho pontu lima (5) diferensa golu, Assalam FC iha pozisaun da-lima ho pontu lima (5) maibé diferensa golu.
Iha pozisaun da-neen Coração FC akomula pontu haat (4), pozisaun da-hitu okupa husi AD SLB Laulara ho pontu haat (4) diferensa golu, iha pozisaun da-ualu okupa husi AS Ponta Leste ho pontu haat (4) diferensa golu.
Entretantu, ekipa rua ne’ebé okupa iha lina ikus liu ne’ebé kandidatu ba jona degradasaun mak DIT FC ne’ebé hetan de’it pontu tolu (3) no Portu Taibessi ho pontu rua (2).
Jornalista : Hortencio Sanchez
Editór : Cancio Ximenes
