JAKARTA, 30 Juñu 2025 (TATOLI) – IX Governu Konstitusionál liuhusi Ministru Transporte no Komunikasaun (MTK) Miguel Marques Gonçalves ‘Manetelo’ akompaña husi Sekretáriu Estadu Komunikasaun Sosiál (SEKOMS), Expedito Loro Dias Ximenes hala’o vizita ofisiál ba empreza Google iha Jakarta, Indonezia.
Ministru Manetelo hatete, prosesu hirak-ne’e la’o dezde 2024 no hola parte hanesan área prioridade ida hosi kompromisu IX Governu Konstitusionál nian.
“Iha Fulan Janeiru tinan ne’e, reuniaun ho Ministru Dijitalizasaun Komunikasaun ASEAN iha Tailándia, google oferese lunch meeting (Jantar konfraternizasaun) google husu mai ha’u , atu ita (Timor-Leste ) tenke halo atualizasaun sira,” Ministru Transporte no Komunikasaun (MTK) Miguel Marques Gonçalves ‘Manetelo’ informa liuhusi nota imprensa ne’ebé Ajénsia TATOLI asesa, ohin.
Iha biban ne’e, Sekretáriu Estadu Komunikasaun Sosial, Expedito Loro Dias Ximenes haktuir, ho vizita parte governu Timor-Leste nian ba google Indonézia atu haree besik no ko’alia direita ho empreza dijitál jigante ne’e.
“Google iha Jakarta (Indonésia) iha merkadu dijitál boot, iha Content Creator barak. Inklui iha Timor-Leste iha mós timoroan barak iha ona talentu ba Content Creator”, Secretário Estadu esplika.
Nia mós haktuir, ninia prezensa ho Ministru Manetelo hasoru empreza Google hanesan kontinuasaun husi reuniaun inisiál entre SEKOMS ho content creator timoroan besik na’in-200 iha inísiu mandatu, husi enkontru anteriór ne’e joven barak hato’o pedidu oinsá IX Governu bele lori empreza google ninia reprezentasaun mai iha Timor-Leste. *
TATOLI
