DILI, 01 JULLU 2025 (TATOLI)-Polísia Nasionál Timor-Leste (PNTL) liuhusi ninia portavós Superintendente Polísia João Belo dos Reis, husu ba inan-aman sira kontrola oan sira-nia movimentu atu labele sai vítima ba esplorasaun seksuál.
Autoridade seguransa ne’e afirma hodi husu inan no aman sira-nia atensaun atu sai edukadór di’ak ba oan sira.
“Inan-aman tenki sai edukadór di’ak, kontrola oan sira-nia movimentu oras tama no sai husi uma, nune’e sira labele sai vítima ba grupu balun ne’ebé ho intensaun la di’ak hodi halo esplorasaun seksuál hasoru labarik feto ho minoridade”, dehan nia ba jornalista sira iha Kuartel Jerál PNTL, Kaikoli, tersa ne’e.
Alerta ne’ebé nia halo, relasiona ho Dirasaun Servisu Investigasaun Kriminál ho Servisu Migrasaun nia operasaun hamutuk iha tersa, (30/6) kalan maizumenus tuku 21.00 bá otél sira iha Dili laran, ne’ebé fasilita prátika esplorasaun seksuál hasoru labarik sira.
Husi operasaun ne’e, nia dehan parte autoridade konsege salva labarik feto na’in-neen ho suspeitu balun.
Parte investigasaun, nia akresenta halo ona identifikasaun ba vítima no suspeitu ne’ebé identifikadu, no ekipa prepara hela relatóriu auto notísia atu aprezenta ba ministériu públiku hodi kontinua tuir lei.
Notísia relevante: PNTL submete kazu abuzu seksuál 30-resin ba MP iha 2022
Jornalista : Natalino Costa
Editora : Rita Almeida
