BOBONARU, 02 Jullu 2025 (TATOLI)—Dirijente eskola ho líder komunitária husi Suku Manapa, Postu Administrativu Kailaku, Munisípiu Bobonaru, preokupa ho implementasaun projetu konstrusaun sala-aula tolu Ensinu Báziku Filiál (EBF) Roetete nian tanba atrazadu.
“Projetu ne’e la’o atraza ne’e fó impaktu ida mai ami atu hanorin tanba konstrusaun la’o kuaze fulan haat ka lima ona maibé to’o iha klaran paradu tiha. Ami lahatene loos nia fukun ne’e husi saida. Ne’e mak ami husu ba kompañia na’in aselera lalais konstrusaun ne’e para ami hala’o prosesu aprendizajen. Agora ami uza de’it sede aldeia ho uma-oan ida, iha-ne’ebé tempu udan araska. Udan turuk bebeik no anin boot ona ami sulan hamutuk iha sede aldeia,” Koordenadór EBF Roetete, Santana Berre Bau, ba TATOLI iha nia kna’ar fatin, kuarta ne’e.
Aleinde ne’e, Xefe Suku Manapa, Jeferino Loco Berre, husu ba Ministériu Edukasaun atu tau-atensaun séria ba problema ne’e tanba durasaun tempu ba implementasaun obra ne’e ramata ona iha fulan-Marsu liubá.
“Sira implementa iha fulan-Outubru 2024 mai to’o agora ita bele dehan konstrusaun ne’e seidauk to’o pursentu 50. Sira abandona obra kuaze fulan tolu ona,” nia haktuir.
Notisia Relevante:Projetu konstrusaun eskola 2024 atinji ona pursentu 40
Jeferino Loco Berre informa katak kuarta (02/07/2025) ne’e, nia parte komunika ho diretór kompañia atu toma responsablidade hodi kontinua obra ne’e.
“Diretór dahan osan atu kontinua obra ne’e mak laiha. Sei hein osan husi Governu atu halo pagamentu pursentu 25. Ha’u orienta tiha ona ha’u-nia pesoál sira prepara hela karta ida ba Diretór Edukasaun Munisipál para bolu atensaun ba kompañia ne’e,” Loco Berre tenik.
Tuir informasaun ne’ebé jornalista TATOLI rekolla husi traballadór Kompañia Fernandez Unipesoál, Lda, iha lokál projetu katak obra ne’e paradu tanba hahú implementa servisu fíziku iha fulan-Novembru 2024 hasoru kedas udan nune’e obrigadu tenke paradu no kondisaun estrada mós la permite atu halo mobilizasaun materiál fabrikadu liuliu lokál.
Traballadór ne’e afirma iha semana ne’e nia laran badaen sira hahú fali ona halo servisu tanba estoke materiál lokál no fabrikadu sufisiente no kondisaun dalan mós di’ak ona.
Servisu fiziku ba implementasaun obra ne’e atinje ona 40% liu no dadaun ne’e to’o ona faze atu cor sinta leten.
Enkuantu, obra ne’e Kompañia Fernandez ezekuta ho valór orsamentu $91.729,36 ne’ebé tuir kontratu terminadu iha fulan-Marsu 2025.
Jornalista: Sergio da Cruz
Editór: Xisto Freitas da Piedade
