DILI, 02 Abríl 2025 (TATOLI)-Projetu konstrusaun eskola ba tinan 2024 nian ne’ebé hamutuk 21 ne’e ninia prosesu daudaun ne’e atinje ona pursentu 40.
Diretór Diresaun Nasionál Infraestrutura no Edukativu iha Ministériu Edukasaun (ME), Hélio Lopes, hatete projetu 21 ida-ne’e ho nia saladeaula hamutuk 46 mak no nia orsamentu purvolta miliaun $2.5.
“Tinan kotuk ita iha orsamentu purvolta miliaun $2.5 ne’ebé ita aloka ba projetu foun, ba eskola ne’ebé ita konstrui ninian saladeaula ne’e hamutuk eskola 21 ho nia saladeaula 46 ne’ebé ninia progresu atinji ona purvolta 40% no projetu hirak ne’e ida konklui ona iha munisípiu Aileu, ne’ebé sira seluk mós besik atu konklui ona”, dehan Helio Lopes iha knaar fatin, kuarta ne’e.
Nia hatutan, projetu hirak ne’e tuir loloos konklui hotu ona maibé seidauk tanba klima no eskola sira-ne’e maioria ninia asesu ba estrada difisil tebes-tebes bainhira iha tempu udan no distansia dook husi kapitál munisípiu.
“Tanba ne’e mak difikulta uituan mobilizasaun materiál konstrusaun sira to’o ikus atrazu uituan maibé ami orienta ona kontratór sira ne’ebé responsavel ba obra hirak-ne’e sei konklui tarde liu iha Juñu tenke entrega ona ba Ministériu Edukasaun”, nia informa.
Notísia relevante: Projetu konstrusaun eskola tinan-2021, falta 14 mak seidauk finaliza
Jornalista : Osória Marques
Editora : Rita Almeida
