Parlamentu autoriza Prezidente Repúblika partisipa Simeira CPLP iha Giné-Bisau
DILI, 07 Jullu 2025 (TATOLI) – Parlamentu Nasionál (PN) aprova ona pedidu dezlokasaun Prezidente Repúblika (PR), José Ramos Horta, bá Giné-Bisau, entre loron 16 no 20 Jullu 2025.
Xefe Estadu hato’o pedidu dezlokasaun, tanba hetan konvite husi Prezidente Repúblika Giné-Bisau, Umaro Sissoco Embaló, atu partisipa Simeira Xefe Estadu no Xefe Governu Komunidade País Ko’alia Lian Portugés (CPLP, sigla portugés).
“Rezultadu votasaun asentimentu Prezidente Repúblika a favór 46, kontra 0, abstensaun 0″, Prezidente Parlamentu Nasionál, Maria Fernanda Lay, fó sai iha sala plenária, ohin.
Simeira Xefe Estadu no Xefe Governu CPLP ba da-XV sei hala’o iha loron 18 fulan-Jullu tinan ne’e. Simeira ne’e reúne Xefe Estadu no Xefe Governu husi Estadu-membru sia no partisipa mós husi reprezentante nasaun sira seluk iha mundu no organizasaun internasionál oioin ho objetivu mak diskute estratejia komún, kooperasaun ba dezenvolvimentu sustentavel no soberania alimentár ho tema jerál “CPLP no Soberania Alimentár nu’udar Dalan ba Dezenvolvimentu Sustentavel”.
Hahú iha loron 13 Jullu, sei iha enkontru husi entidade oioin no inisiativa sira seluk, no sei iha mós momentu ba pasajen prezidénsia CPLP ba Giné-Bisau.
Durante semana ida, entre reuniaun sira ne’ebé programada, inklui enkontru Konsellu Ministru Negósiu Estranjeiru CPLP hanesan baibain.
Giné-Bisau sei asume prezidénsia rotativa CPLP ba mandatu tinan rua, ne’ebé susede Saun Tomé no Prínsipe.
Rekorde katak simeira CPLP ikus ne’e hala’o iha Agostu 2023 iha Saun Tomé, nasaun ne’ebé susede Angola iha prezidénsia organizasaun nian.
Estadu-membru CPLP mak Angola, Brazíl, Kabu Verde, Giné-Bisau, Giné Ekuatoriál, Mosambike, Portugál, Saun Tomé no Prínsipe no Timor-Leste
Jornalista: Nelson de Sousa
Editora: Maria Auxiliadora
