Top

PNTL identifika empreza-ida ba kazu Timoroan sira iha Brunei Darusalam

Portavós Komandu Jerál PNTL, Superintendente Polísia João Belo dos Reis. Imajen/TATOLI

DILI, 07 Jullu 2025 (TATOLI)-Polísia Nasionál Timor-Leste (PNTL) halo ona prosesu identifikasaun ba empreza-ida ho inisiál A.M, ba kazu timoroan sira ne’ebé partisipa rekrutamentu husi ajénsia, hodi servisu iha Brunei Darusalam.

“Ita bolu empreza ho inisial A.M halo indentifikasaun no investiga hodi hatene loos ka la’e sira mak rekruta timoroan ne’ebé agora daudaun iha Brunei. Ita seidauk promove krime ruma ba sira”, Portavós Komandu Jerál PNTL, Superintendente Polísia João Belo dos Reis, ba jornalista sira iha Komandu Jerál PNTL Kaikoli, segunda-ne’e.

Nia dehan ekipa identifikasaun seidauk atribui krime tráfiku ba empreza ne’e no mós parte polísia seidauk hatene loloos númeru timoroan ne’ebé agora daudaun sente abandonadu iha rai Brunei Darusalam.

“Ohin bolu sira mai halo identifikasaun ba empreza na’in ho estrutura, durante-ne’e kompañia halo atividade saida de’it, sira-nia lisensa ne’e halo saida”, nia haktuir.

Autoridade polisiál ne’e haktuir empreza ne’ebé sira-nia parte halo identifikasaun, fulan-rua ba kotuk halo rekrutamentu ba timoroan sira hodi servisu iha fábrika-ida iha Brunei, maibé realidade hatudu formuláriu ne’ebé sira prenxe la hanesan faktu ne’ebé hatudu iha terenu.

Ho situasaun ne’e, nia dehan Dirasaun Investigasaun Kriminál Nasiionál konsidera ida-ne’e problema seriu, no presiza atuasaun husi parte polísia.

Nia husu ba timoroan sira atu labele naran fiar ajénsia sira ne’ebé rekruta timoroan sira ne’ebé atu bá servisu iha rai-liur.

“Husu ba timoroan sira favór buka servisu bá rai-liur karik tenke tuir fonte ofisiál mak ita-nia Governu ne’e mak Sekretaria Estadu Formasaun Profisinál no Empregu, labele naran fiar ba empreza-ida. Kuandu empreza mak halo rekrutamentu ne’e informa ba PNTL para halo atuasaun”, nia fo-hanoin.

Notísia relevante: Tribunál aplika Prizaun Preventiva ba arguidu na’in-rua envolve krime tráfiku umanu

Jornalista       : Natalino Costa

Editora           : Rita Almeida

Publisidade

Leave a Reply

Latest Post

error: Content is protected !!