PNTL kontinua investiga kazu asaltu malu iha Lourba-Karabau
DILI, 07 Jullu 2025 (TATOLI)-Ministériu Públiku (MP) atribui delegasaun kompeténsia ba Polísia Nasionál Timor-Leste (PNTL) liuhusi Dirasaun Servisu Investigasaun Kriminál hodi kontinua halo investigasaun ba kazu asalta malu iha suku Lourba no Karabau, postu administrativu Bobonaru Vila, munisípiu Bobonaru iha tinan-2023.
“Faktu saida mak ami hetan iha prosesu ida-ne’e, ha’u labele adianta tanba segredu justisa, maibé sertamente faktu sira ne’ebé ami arrola ne’e ba kazu asalta-malu ne’ebé ita-boot sira hatene akontese iha Lourba no Karabau, ne’ebé komunidade nia uma balun hetan estragu” Portavós Komandu Jerál PNTL, Superintendente Polísia João Belo dos Reis, hatete ba jornalista sira iha nia knaar fatin, segunda-ne’e.
Nia dehan prosesu balun entrega ona ba ministériu públiku. “Dala ida tan ha’u dehan ami konklui ona prosesu ne’e no remete ona ba ministériu públiku, tanba kestaun segredu justisa ha’u labele fó sai klean liu konaba saida mak ami arrola”.
Kazu asalta-malu ne’e akontese iha loron kinta, (02/11) no sesta, (03/11) tinan-2023. Husi akontesimentu ne’e, PNTL identifika suspeitu na’in-hitu, uma hamutuk 10 mak hetan sunu, uma tolu hetan estragu inklui kios rua mak hetan estragu.
Notísia relevante: PNTL sei investiga ema na’in-hitu deskonfia envolve kazu Lourba-Karabau
Jornalista : Natalino Costa
Editora : Rita Almeida
