DILI, 08 Jullu 2025 (TATOLI)-Polísia Nasionál Timor-Leste (PNTL) liuhusi Diresaun Tránzitu Seguransa Rodoviária Nasionál (DTSR) hatama reseita ba kofre Estadu hamutuk $396.842.409 liuhusi atividade pasa-revista no patrullamentu.
“Atividade pasa-revista no pontu entrada ne’e tau hamutuk mak ho montante $396.842.409”, Diretór DTSR, Superintendente Assistenste Polísia Luis da Costa, ba jornalista sira iha nia kna’ar fatin Komandu Jerál PNTL Kaikoli, tersa ne’e.
Nia dehan fonte reseita husi pontu entrada maihusi Batugade (Bobonaru), Mota-Masin (Kovalima), Sakatato no Oesilo (Oekusi) hamutuk $111.409. Tanba, karreta sira tama husi nasaun viziñu.
Nia mos informa konaba asidente no insidente husi Janeiru – Juñu. Asidente mak 562, husi númeru ne’e ema na’in-22 mak lakon vida, kanek todan 85 no kanek kamán 455.
Nia informa, husi númeru ne’e iha kazu ne’ebé mak solusiona ona iha tribunál kazu neen, no ne’ebé prosesu iha tribunál hamutuk 19, rezolve nivel infratór hamutuk 121, sei iha prosesu mak 306.
“Kazu asidente sira ne’ebé kontribui husi Janeiru too Juñu mak fatór umanu”, nia konklui.
Notísia relevante: Polísia tránzitu kontribui reseita ba Estadu hamutuk $813.393
Jornalista : Natalino Costa
Editora : Rita Almeida
