BNCTL oferese $5.000 ba feto faluk Imaculada Atola
DILI,12 jullu 2025 (TATOLI)—Banku Nasionál Komérsiu Timor-Leste (BNCTL, sigla portugés) oferese osan ho montante $5.000 ba feto faluk, Imaculada Atola, ne’ebé hela iha Hera.
Prezidente Konsellu Administrasaun BNCTL, Januário da Gama, hateten, iha ámbitu aniversáriu ba dala-14 BNCTL hakarak ajuda oituan inan feto faluk, tanba haree nia kondisaun uma iha Hera la permite atu hela.
“Apoiu ida-ne’e halo depoisde mídia sira fó sai ho ninia kondisaun moris, entaun ida-ne’e reflete kedas ho funsaun ida responsabilidade sosiál. Tanba ne’e, husi Banku nia apoiu ba inan faluk ida-ne’ebé mak ita deskobre katak moris ho kondisaun ladun di’ak,” Januário da Gama, hato’o iha ámbitu selebrasaun aniversáriu BNCTL, iha Sentru Konvensaun Dili, Sábadu ne’e.
Nia dehan, mensajen ne’ebé atu hato’o ba sosiedade sira, katak BNCTL hanesan banku Estadu, entaun hotu-hotu hanesan sosiedade Timor tenke hadomi Banku Nasionál no rai osan iha banku ida-ne’e.
“Husi Banku atu kontinua investe no kapitaliza ita-nia ekonomia rai-laran, entaun husi ida-ne’e mak kontribui loloos ba ita-nia dezenvolvmentu nasaun,” nia akresenta.
Notísia relevante : BNCTL lansa plataforma dijitál KOHE hodi fasilita trasasaun online entre kliente
Iha fatin hanesan, Inan faluk, Imaculada Atola agradese ba BNCTL ne’ebé oferese ona apoiu.
“Ha’u agradese ba Banku Nasionál Komérsiu Timor-Leste ne’ebé direitamente to’o ha’u-nia fatin iha Hera ho kondisaun uma ne’ebé mak ladiak, entaun ohin sira apoiu ha’u ho osan $5.000 hodi ajuda ha’u-nia neseisddae sira,” Imaculada katak.
Nia dehan, osan ne’e sei utiliza ba neseidade uma-laran nomós haree ba oan sira-nia eskola.
Jornalista : Felicidade Ximenes
Editora : Julia Chatarina
