Top

PNTL detein kazál-ida ba krime burla

Diretór Nasionál Servisu Investigasaun Kriminál Nasionál, Superintendente Polísia João Belo dos Reis. Imajen/TATOLI

DILI, 16 Jullu 2025 (TATOLI-Diretór Diresaun Servisu Investigasaun Kriminál Nasionál, Superintendente Polísia João Belo dos Reis, informa ninia parte detein ona suspeitu na’in-rua ba krime burla.

Suspeitu na’in-rua ne’e hanesan kazál ho inisiál TDS no H, ajente ne’ebé rekruta husi Indonézia hodi halo promosaun ho konteúdu gratis ida bainhira sosa ida ba produtu karreta, motór, sasán eletróniku seluk. Vítima ba kazu ne’e mak FHB.

Promosaun ne’ebé suspeitu sira halo mak uza figura artista Indonézia, Baim Wong no Raffi Ahmad.

“Tanba ita-nia vítima horiseik konsege haruka osan kuaze $6.000, nune’e nia sente prejudikadu ba asaun ida-ne’e, nia hato’o keixa”, João Belo ba jornalista sira iha nia kna’ar fatin Kuartél Jerál Kaikoli, kuarta-ne’e.

Nia mos dehan asaun hodi halo operasaun ba atividade ne’e lidera husi Inspetór Xefe Polísia Aquiles Dias ho nia rezultadu mak detein kazál ne’e.

Tanba ne’e, Polísia Nasionál Timor-Leste (PNTL) hakarak informa ba komunidade atu halo tranzasaun tenke hatene loloos fornesedór husi sasán ne’ebé hakarak hola.

“Tenke hatene mós nia legalidade normál ka la normál, ilegál ou legál, tenke hatene didiak mak haruka osan para labele sai vítima ba tranzasaun online ka tranzasaun ne’ebé maka iha”, nia afirma.

João Belo hateten PNTL hamutuk institusaun sira seluk, liuhusi jornalista kontinua eduka komunidade hodi hatene krime online sira hotu, no labele sai vítima ba tranzasaun ne’ebé bele prejudika sira.

Komandante ne’e dehan, PNTL konsidera atu tranzasaun online ne’e krime ba falsifikasaun no krime burla no krime seluk, tanba ne’e PNTL sei dezenvolve hodi akuza suspeitu sira.

Nia afirma liután PNTL ho ninia parseiru sira iha estranjeiru no mós iha Timor sei buka tuir rede ida-ne’e, hodi Timoroan labele sai vítima tanba tipu krime hanesan ne’e barak ona.

“Vitima sira ba kazu hanesan ne’e barak ona, tanba ne’e husu ba públiku atu koopera kuandu iha modu sira hanesan mosu iha facebook hodi habosok imi, favór informa mai polísia hodi foti asaun ba ida-ne’e”, nia konklui.

Krime burla iha lei kódigu penál mak artigu 266 (Burla simples), artigu 267 (Burla agravada), artigu 268 (Burla informátika), artigu 269 (Burla informátika agravada).

Notísia relevante: Kada tinan PCIC rejista krime burla ho númeru boot

Jornalista       : Natalino Costa

Editora           : Rita Almeida

Publisidade

Leave a Reply

Latest Post

error: Content is protected !!