DILI, 11 fevereiru 2025 (TATOLI)—Diretór Polísia Sientífika Investigasaun Kriminál (PCIC, sigla portugés), Vicente Fernandes e Brito, hateten kada tinan PCIC rejista kazu burla hamutuk 40.
“Relatóriu Polísia Sientífika Investigasaun Kriminál ba tinan 2024 ami sei prepara hela. Maibé, ha’u atu dehan de’it katak kazu ne’e kada tinan PCIC sempre rejista barak liu mak kazu burla agravadu no kazu burla ne’e purvolta 40,” Vicente hateten ba jornalista TATOLI iha nia kna’ar fatin, Colmera, Dili, tersa ne’e.
Notísia relevante: PNTL detein suspeitu JMR tanba envolve krime burla
Nia esplika, burla agravadu mak hanesan kazu bosok (máfia) iha instituisaun Estadu no mós iha sosiedade no grave liu ne’ebé PCIC atende kada tinan ne’e ho valór osan liu $2.000. Kazu segundu ne’ebé kada tinan PCIC rejista mak kazu falsifikasaun dokumentu.
“Agora daudaun ita simu prosesu ba kazu falsifikasaun dokumentu husi Ministériu Públiku hodi ita atu kontinua halo investigasaun, soké dadus ne’e hira mak ha’u ladún hatene,” nia konklui.
Jornalista: Natalino Costa
Editór: Xisto Freitas da Piedade
