Komandante Orlando enkoraja joven postu Kristu-Rei kria dame

DILI, 17 jullu 2025 (TATOLI)-Komandante Polísia Nasionál Timor-Leste (PNTL) Munisípiu Dili, Suprintendente Xefe Polísia Orlando Gomes, enkoraja joven sira iha postu administrativu Kristu-Rei kria dame iha ida-idak nia bairru hodi hakribi violénsia.
Nia dehan triste haree konflitu hahú mosu iha área postu administrativu Kristu-Rei hanesan Bekora, Kuluhun, Bidau Santa-Ana, Bidau Toko Baru, Kolam Vitória inklui Bidau Akadiruhun no Lecidere.
Komandante husu ba joven sira muda mentalidade no ba autoridade lokál hanesan konsellu suku, polisiamentu komunitáriu no ofisiál polísia suku, kontrola joven sira no kria relasaun di’ak hodi kria amizade no hametin dame iha postu ne’e.
“Ha’u husu ba OPS sira, KPK servisu hamutuk ho lideransa komunitária sira atu kria amizade, pas no estabilidade iha ita-nia rai”, nia dehan ba jornalista sira iha nia servisu fatin, Kaikoli, kinta-ne’e.
Fukun husi problema sira ne’ebé mosu, tuir nia haree tanba autoridade lokál no seguransa ladún másimu iha servisu hamutuk.
Nia afirma hodi husu ba joven sira atu valoriza ukun-an ne’e, tanba joven sira uluk, barak mak entrega vida ba independensia Timor nian. “Ohin loron imi joven sira moris di’ak, maibé oinsa imi atu goja rai ida-ne’e tenke kria pás no estabilidade”.
Suprintendente Xefe Polísia Orlando Gomes husu ba inan no aman sira atu kontrola oan sira-nia movimentu kalan. “Oan sira sai tarde liu ne’e tuku 21.00 tenke iha uma ona, to’o tuku 22.00 tenke buka tuir”.
Biban ne’e nia apela ba joven sira iha área Kuluhun, Bekora no seluk tan atu hatudu hahalok di’ak hodi apoia seguransa iha eventu jogu desportivu CPLP.
“Nunee ita-nia konvidadu sira ne’ebé husi nasaun CPLP mai partisipa jogu iha ita-nia rai ho di’ak”, nia konklui.
Notísia relevante: PNTL halo simulasaun seguransa ba fatin eventu jogu desportivu CPLP
Jornalista : Natalino Costa
Editora : Rita Almeida

