DILI, 17 Jullu 2025 (TATOLI)-Komandu Jerál Polísia Nasionál Timor-Leste (PNTL) liuhusi Segundu Komandante Jerál, Komisáriu Pedro Belo, akompaña husi Komandante Komandu Operasaun Nasionál, Superintendente Xefe Polísia Justinho Menezes no komandante unidade sira observa simulasaun membru polísia sira ne’ebé sei destaka ba fatin realizaun jogu desportivu CPLP.
Komandu PNTL hatún membru sira husi Unidade Espesiál Polísia (UEP), Unidade Polísia Marítima (UPM), Unidade Patrollamentu Fronteira ne’ebé destakada iha Aeroportu, Diresaun Tránzitu Seguransa Rodoviária, Sentru Formasaun Polísia, membru sira Kuartél Jerál inklui Komandu PNTL Munisípiu Dili hodi fó seguransa másima ba fatin sira ne’ebé mak sei realiza jogu desportivu CPLP hanesan estádiu munisipál Dili, Jinásiu Dili, fatin jogu tenis ne’ebé lokaliza iha Universidade Nasionál Timor-Leste no Viera-Mar Lecidere, ne’ebé mak nu’udar fatin ba jogu voleiból-praia no mós fatin sira ne’ebé delegasaun sira hela.
Komandante Komandu Operasaun Nasionál PNTL, Superintendente Xefe Polísia Justinho Menezes, hateten ohin Komandu PNTL mai estádiu Munisipál Dili nu’udar simulasaun oinsá atu fó seguransa durante jogu, ne’ebé sei hahú husi loron 19 Juñu to’o 27 Jullu 2025. Tanba ne’e mai iha ne’e atu fó koñesimentu ba membru sira-nia área servisu iha servisu liga ba operasionál ninian.
“Sira ne’e mak sei asegura seguransa durante jogu hahu hosi 19 to’o 27 Jullu 2025. Seguransa ba jogu desportivu CPLP nian ne’e ita iha métodu seguransa tolu, ida mak seguransa maisde proximu katak, ba membru sira fó seguransa besik liu iha eventu jogu sira”. Nune’e ohin mobiliza membru sira mai para bele hetan briefing, komesa horiseik ohin no aban la’o nafatin para intensaun eventu ne’e ho di’ak, oinsá ho regras detallu sira, ita fó ba sira tenki la’o tuir ida ne’e”, dehan nia ba jornalista sira bainhira ho ekipa halo observasaun.
Justinho esplika métodu daruak mak seguransa proximu katak, membru sira fó seguransa besik uituan iha eventu refere, maibé sira la tama iha estádiu laran durante jogu la’o.
“Sira ne’e mós hetan briefing saida mak sira sei halo, komesa hosi tránzitu no sira seluk tanba sira ne’e naran tama lista ba seguransa, tenki hetan briefing. Ohin ne’e ita fó ona orden ba komandante tátika sira para sira bele briefing ba membru sira ne’e para iha atensaun, ida-ne’e mak ita halo”, nia esplika.
Nia dehan, métodu datoluk mak seguransa forsada katak, membru polísia sira ne’ebé dook hosi estádiu hodi halo monitorizasaun ba fatin sira delegsaun hela no fatin jogadór sira halo treinu.
Nia husu ba adeptu sira bainhira asiste jogu, tama tuir regra maske ne’e gratuita. Bainhira fatin sira ne’ebé halo eventu jogu CPLP ema nakonu ona, tenke la’o tuir regra.
“Ita sei asegura hotu seguransa hahú hosi jogadór hosi nasaun sira tama mai to’o iha fatin espesiál hanesan estádiu munisípiu Dili, jinásiu, Viera-Mar no UNTL, fatin haat ne’e mak sai fatin espesiál ba jogu”, nia afirma.
Komandu operasaun nasionál ne’e hateten, komandu koloka ona membru polísia sira ba fatin destinadu, nune’e PNTL sei garante seguransa.
“Ita halo ona liña koordenasuan ho F-FDTL karik durante jogu mosu problema balun no situasaun la permite hanesan forsa amiga ita sei husu para sira reforsa hodi halo atuasaun”, nia konklui.
Notísia relevante: Komandu PNTL mobiliza rekursu tomak hodi fó seguransa ba jogu desportivu CPLP
Jornalista : Natalino Costa
Editora : Rita Almeida
