DILI, 20 jullu 2025 (TATOLI) – Rezultadu jogu entre Timor-Leste kontra Tailándia rezulta Ekipa nasionál lafaek eliminadu husi jogu Association of Southeast Asian Nations (ASEAN) Championship Mandiri Cup tinan-2025.
Ekipa selesaun nasionál partisipa iha eventu futeból rejionál referida koloka iha grupu C hamutuk ho nasaun rua-seluk hanesan Myanmar ho Tailándia, iha-ne’ebé rezultadu faze kualifikasaun Timor-Leste rekolla pontu ida hosi jogu rua.
Husi jogu kontra Ekipa Tailándia 0-4 rezulta Timor-Leste tenki hiit-ain husi kompetisaun nível Asean nian iha-ne’ebé posibilidade Myanmar mos sei elemina bainhira empata no derrota kontra Tailándia.
Diretór Kompetisaun Eventu Federasaun Futeból Timor-Leste (FFTL), João Campos esplika, maske Timor-Leste retira husi eventu ne’e, maibé jeralmente ekipa Lafaek hatudu progresu tanba jogu kontra Myanmar mesmu empata 4-4 maibe kontinua esforsu durante menitu 90.
“Iha mudansa ba ekipa nasionál U-23, iha determinasaun ho rezultadu empata ho Myanmar, ida-ne’e hatudu mudansa ba ekipa selesaun U-23,” Diretór Kompetisaun FFTL informa ba Ajênsia TATOLI iha Sentru Konvensaun Dili (CCD, sigla Portugés), dumingu ne’e.
João salienta, derrota kontra Tailándia maibé kompetisaun referida nu’udar parte prepativu ba ekipa Lafaek antes partisipa iha eventu nível kontinente Ázia iha turneu AFC U-23 qualifiers ne’ebé koloka iha grupu D no tuir kalendáriu sei realiza iha Xina, loron-1 to’o 10 fulan-setembru mai.
Nia rekoñese, Tailándia nune’e ekipa forte iha futeból nível rejionál ASEAN tanba dezenvolvementu la’o avansadu ona hanesan jogadór sira halo preparasaun ne’ebé di’ak bainhira kompara ho nasaun seluk inklui Timor-Leste.
“Kuaze ekipa hotu iha ASEAN rekoñese Tailándia ekipa forte, mesmu ekipa selesaun Timor-Leste halo esforsu,” João Campos akresenta.
Entretantu, tuir sistema jogu kompetisaun referida hafoin remata faze grupu, ekipa haat mak hakat ba meius finál nune’e rezultadu tabela klasifikasaun iha grupu A Malazía kategoriza nu’udar the best second Runner up tanba rekolla pontu tolu bainhira kompara ho Kambodia iha grupu B rekolla pontu ida inklui Timor-Leste iha grupu C.
Notísia relevante: Timor-Leste derrota 0-4 kontra Tailándia iha jogu AFC U23
Jornalista : Natalino Belo
Editór : Evaristo Soares Martins
