Voleiból praia : ekipa feto Portugal manán set rua kontra Timor-Leste
DILI, 20 Jullu 2025 (TATOLI)—Iha ámbitu jogu Desportivu Komunidade País Lian Portugés (CPLP, sigla portugés) ba dala-XII iha modalidade Voleiból Praia, ekipa kompozisaun feto husi Portugal (A3) konsege manán set rua kontra Timor-Leste (A4), iha kampu 2 Bidau-Lesidere, Domingu ne’e.
Ekipa eskalaun feto husi Portugal no Timor-Leste hasoru malu iha jogu daruak iha tuku 10:00, hafoin Cabo-Verde (A1) kontra Mozambike (A2), iha loron dahuluk.
Árbitru ba jogu ne’e husi Timor-Leste Bonifacio Agus, husi Ángola mak Marcio, enkuantu jogadora husi Portugal mak Inês Silva no Matilde Silva, Timor-Leste mak Agusta Belo da Silva no Miguela Belo.
Set dahuluk Portugal lidera ho pontu 21 no Timor-Leste ho pontu 16, set daruak Timor-Leste ho pontu 21 no Portugal ho pontu 18, no set ikus Portugal ho pontu 15 no Timor-Leste ho pontu 12.
Notísia relevante : Ekipa mane husi Portugál hetan vitória iha jogu voleiból praia
Jogadora husi Portugal, Inês Silva, konsidera jogu Voleiból Praia ne’e interresante tebes no ohin halo esforsu tomak hodi halakon adversáriu.
“Di’ak tebes sempre manán, hanesan ami-nia símbolu Portugal hanesan nasaun ida, tanba ne’e ita-nia nasaun sempre manán. Ne’e interresante tebes,” Inês Silva hateten ba jornalista sira, iha kampu Voleiból Praia, Bidau-Lesidere.
Jogadora Portugal ne’e otimista sei halo preparasaun di’ak hodi sai kampeãs iha modalidade ne’e.
“Ha’u hein katak jogu tuir mai ami sei manán nafatin. Agora ami fila bá deskansa hodi prepara-an nune’e sei kompete tan iha jogu tuir mai. Ami prepara atu mellora di’ak liután no hakarak manán iha Jogu Desportivu CPLP XII ne’e,” nia katak.
Jogadora husi Timor-Leste, Agosta Belo da Silva, sente triste no hamonu matan-been bainhira derota husi ekipa Portugal.
“Sente triste lakon iha jogu Voleiból Praia ho ekipa Portugal,” nia tenik.
Jornalista : Osória Marques
Editora : Julia Chatarina
