Voleiból Praia : ekipa mane São Tomé e Príncipe lakon set rua husi Portugal
DILI, 21 Jullu 2025 (TATOLI)—Iha ámbitu kompetisaun Jogu Desportivu Komunidade País Lian Portugés (CPLP-sigla portugés) ba dala-XII, modalidade Voleiból Praia, ekipa mane husi São Tomé e Príncipé lakon set rua husi ekipa Portugal.
Set dahuluk Portugal hetan pontu 21, enkuantu São Tomé e Príncipe ho pontu 9, kontinua ba set rua Portugal ho pontu 21 no São Tomé e Príncipe ho pontu 11, nune’e Portugal sai vensedór ba Voleiból Praia mane iha loron daruak nian.
Iha jogu ne’e, árbitru husi Timor-Leste mak Evaristo Cabral no Carlos da Costa, enkuantu jogadór husi Portugal mak Tito Oliveira no Filipe Neto no husi São Tomé e Príncipe mak Mauro Simões no Osmar Tomer.
Jogadór husi Portugal, Filipe Neto, hateten, nia ekipa bele manán jogu ne’e tanba antes ne’e halo preparasaun ho di’ak.
“Ami iha preparasaun ne’ebé eselente, hanesan ita-boot bele haree, ami joga iha set sira ne’ebé ladún ekilibradu. Ida-ne’e maka jogu ida-ne’ebé maka monu maka’as ba ami-nia sorin, no ami konsege impoin ami-nia serbisu ba arma ida-ne’ebé maka’as. Ami halo ekipa adversáriu nia jogu sai difísil,” Filipe Neto hato’o ba jornalista sira, Iha Kampu Voleiból Praia, Bidau-Lesidere, ohin.
Notísia relevante : Voleiból Praia: ekipa mista Mozambike halakon Cabo-Verde ho totál pontu 61-38
Nia konsidera, adversáriu mesak fraku hodi halo nia ekipa bele aproveita hodi uza tátika sira nune’e bele hamonu iha set rua tutuir malu.
“Ami laiha difikuldade barak iha jogu, lahó dúvida, ami-nia interrese maka manán jogu ne’e no halo ekipa seluk nia jogu sai difísil liután,” nia katak.
Filipe Neto nota ekipa adversáriu ladún preparadu.
“Sira la a’at, ita bele hatene katak sira iha movimentu balun ne’ebé sira bele halo, sira bele baku bola, sira konsege ultrapasa difikuldade balun no marka pontu balun. Ita la’ós iha ne’e atu sai di’ak liu iha mundu, ami iha ne’e atu reprezenta ami-nia nasaun, fó-ami esforsu hotu ho orgullu boot. Ha’u hakarak kongratula ekipa adversáriu ba sira-nia dezempeñu. Ami prátika horisehik iha torneiu, maibé ida-ne’e maka ami nia aprezentasaun ofisiál dahuluk iha torneiu ba selesaun nasionál,” nia katak.
Jogadór São Tomé e Principé, Mauro Simões, dehan, ekipa Portugal di’ak liu iha ne’e. “Ha’u klasifika ida-ne’e hanesan di’ak liu”.
Nune’e mós, Jogadór Osmar Tomer hato’o jogu hasoru Portugal di’ak iha inísiu kedas.
“Tanba ne’e iha inísiu jogu ami iha difikuldade uitoan, hanesan ho resepsaun no seluk tan. Maibé ami konsege hadi’a nomós tanba jogu dahuluk, ami nervozu uitoan, maibé ami hadi’a tuir tempu. Iha jogu daruak, ami hahú di’ak, maibé liu tiha tempu, ami sai fraku,” nia espresa.
Osmar Tomer apresia ho ekipa Portugal ne’ebé prátika nia tátika iha jogu ne’e.
“Ekipa portugés mós hanesan ekipa ida-ne’ebé di’ak liu iha CPLP, kompara ho sira hotu,” nia katak.
Jornalista : Osória Marques
Editora : Julia Chatarina
