DILI, 20 Jullu 2025 (TATOLI)–Jogu Desportivu Komunidade País Lian Portugés (CPLP, sigla portugés) ba dala-XII, modalidade Voleiból Praia, iha parte lorokraik tuku 16:00, ekipa mista (feto no mane) husi Mozambike (A2) konsege halakon Cabo-Verde (A1).
Ba jogu faze ida-ne’e, árbitru Martinho da Costa no José Celestinho husi Timor-Leste, enkuantu jogadora husi Mozambike maka Alaima Ama Mahumane no Arnaldo Lorenco no Cabo-Verde mak Catarina no Denzel.
Set dahuluk, ekipa mista Mozambike ho pontu 21 no Cabo-Verde ho pontu 11, set daruak Cabo-Verde esforsu hodi hetan fali pontu 21 no nia adversáriu ho pontu 19, nune’e set ikus parte rua esforsu hodi Mozambike nafatin manán ho pontu 15, enkuantu Cabo-Verde ho pontu 5. Totál point hosi Mosambike hamutuk 61 no Cabo-verde iha point 38.
Notísia relevante : Ekipa mane husi Portugál hetan vitória iha jogu voleiból praia
Jogadór Mozambike, Arnaldo Lorenco, sente kontente bele manán iha jogu mista ne’e maski difísil.
“Hau-nia sentimentu felis tanba joga ida-ne’e difísil tebes maibé konsege liu no hetan Vitória iha jogu ne’e,” Arnaldo Lorenco, espresa hafoin jogu iha kampu Voleiból Praia, Bidau-Lesidere, Domingu ne’e.
Nia dehan, ekipa mista feto ho mane ida-ne’e difísil ba sira maibé sira na’in-rua esforsu hodi hetan vitória.
“Buat ida-ne’ebé mak ami la treinu ho modalidade foun ida-ne’e no primeira-ves ami implementa jogu feto ho mane. Komplikadu tebes maibé esforsu ne’ebé ami iha bele konsege ho vitória ida-ne’e,” nia katak.
Jogadór ne’e iha esperansa, iha jogu tuir mai bele hetan vitória ho forma ne’ebé di’ak liután.
Jornalista : Osória Marques
Editora : Julia Chatarina
