DILI, 07 Agostu 2025 (TATOLI)—Ministériu Juventude, Desportu, Arte no Kultura (MJDAK) iha ámbitu loron mundiál juventude iha 12 Agostu, sei organiza atividade prinsipál tolu ho kooperasaun husi parseiru dezenvolvimentu sira iha Timor-Leste.
Tema globál ba selebrasaun ne’e mak hanesan ‘Asaun juventude lokál ba atinjimentu dezenvolvimentu sustentávél,’
“Loron mundiál juventude ida-ne’e Ministériu Juventude Desportu Arte no Kultura koopera no serbisu hamutuk ho parseiru dezenvolvimentu sira hanesan UNICEF, World Vision Timor-Leste, PLAN Internasionál no seluk tan hamutuk hodi organiza atividade lubuk ne’ebé nia vantajen ba joven sira,” Diretór Jerál MJDAK, David Tomas de Deus, hato’o liuhusi konferénsia imprensa, iha edifísiu MJDAK, Bidau-Lesidere, Kuarta ne’e.
Notísia relevante : Loron juventude nasionál atu valoriza martir no eroi joven sira
Parseiru dezenvolvimentu sira hanesan UNFPA, UNICEF, World Vision, Child Fund no Plan International kontribui fundu hamutuk $20.000 ba selebrasaun loron mundiál ne’e.
“Selebrasaun ne’e sai plataforma ba joven sira atu hatudu sira-nia hanoin, lideransa no kompromisu ba futuru Timor-Leste,” Diretór Jerál, katak.
Atividade ne’ebé sei organiza durante selebrasaun ne’e mak hanesan :
- Simeira juventude sei realiza iha loron 08 Agostu iha salaun Tower Fatuhada,
- Semináriu nasionál ba lansamentu ofisiál monografia ne’ebé hanaran devedendu demográfiku, nune’e halo mós divulgasaun ida ba relatóriu temátiku juventude nian iha Ótel Timor iha loron 11 Agostu.
- Marsa saudável sei hala’o iha loron 12 Agostu tuku 06:00, mak hanesan la’o ain husi estrada-boot Ministériu Negósiu Estranjeiru no Kooperasaun (MNEK) to’o edifisiu MJDAK nia oin no kontinua kedan ho atividade kuis ba joven sira, sei halo mós espozisaun ba produtu sira ne’ebé joventude sira prodús no ikus liu sei halo distribuisaun fundu ida ba juventude sira.
Joven husi Baukau, Aileu no Bobonaru sei partisipa iha atividade hirak ne’e.
Iha loron ne’e, juventude sira mós sei halo deklarasaun ba governante sira bazeia ba sira-nia semináriu ne’ebé hala’o durante loron-rua ne’ebé liu ona.
Loron mundiál ne’e bazeia ba rekomendasaun husi konferénsia mundiál Ministru responsavél ba juventude, ne’ebé realiza iha Lisboa – Portugal, hahú loron 08 to’o 14 Agostu 1998, ne’ebé Organizasaun Nasaun Unida (ONU) liuhusi Asembleia Jerál hasai rezolusaun nú. 54 /120 hodi fó lejitimidade ba rekomendasaun hodi deklara loron 12 Agostu sai hanesan loron mundiál ba juventude sira.
Jornalista : Hortencio Sanchez
Editora : Julia Chatarina
