DILI, 06 Agostu 2025 (TATOLI)–Prezidente Repúblika, José Ramos-Horta husu ba ekipa juri ba rekrutamentu membru Polísia Nasionál Timor-Leste (PNTL) foun tenke imparsiál.
“Rekrutamentu ne’e tenke imparsiál, labele familiarizmu, tenke buka rekruta feto barak,” Ramos-Horta hateten ba jornalista sira iha edifísiu Embaxaida Portugal iha Dili, Kuarta ne’e.
Xefe Estadu nota, dalabarak Ministériu Interiór (MI) no Komandu PNTL sempre ko’alia kona-ba igualdade jéneru, ho nune’e tenke envolve feto barak iha rekrutamentu.
“Ha’u sei haree feto hira mak sira sei rekruta, se sira rekruta feto oituan de’it mak sira-nia atividade ha’u sei la partisipa,” Xefe Estadu, tenik.
Notísia relevante : PNTL Kovalima hahú distribui formuláriu rekrutamentu ba kandidatu membru PNTL foun
Antes ne’e, PNTL fó sai ofisialmente informasaun kona-ba rekrutamentu ba membru Polísia foun ho totál hamutuk 400 ba tinan 2025, hahú iha loron 05 Agostu.
Tuir informasaun ba joven sira ne’ebé iha interese atu kandidata an, hahú iha loron 05 to’o 29 Agostu, bele foti formuláriu atu prienxe no sei submete fali iha 12 Agostu to’o 09 Setembru 2025.
Rekrutamentu ne’e bazeia ba diploma ministeriál númeru 17/2025, 25 Juñu, regulamentu ba konkursu admisaun públika ba kursu formasaun ba ajente Polísia Nasionál Timor-Leste.
Jornalista : Hortencio Sanchez
Editora : Julia Chatarina
