Ministru Interiór konsidera pedidu Xefe Estadu, fó porsaun ba feto iha rekrutamentu Polísia

DILI, 07 Agostu 2025 (TATOLI)–Ministru Interiór, Francisco Guterres, Kinta ne’e, hasoru malu ho Prezidente Repúblika (PR), José Ramos-Horta hodi relata kona-ba prosesu rekrutamentu Polísia Nasionál Timor-Leste (PNTL) foun.
“Ha’u mai atualiza situasaun seguransa ba Prezidente Repúblika, situasaun agora la’o hakmatek hela, iha ne’e ha’u mós atualiza ba Prezidente kona-ba prosesu rekrutamentu ba membru PNTL foun, ha’u esplika kona-ba kuota ne’ebé Polísia tau atu hetan númeru ne’ebé apropriadu, maibé kona-ba ita-nia Prezidente Repúblika husu ne’e, feto ita sei tau 20% iha rekrutamentu,” Ministru Francisco hateten ba jornalista sira hafoin termina reuniaun ho Xefe Estadu, iha Palásiu Prezidensiál.
Nia esplika, rekrutamentu referidu tau liu prioridade ba feto tanba iha PNTL feto seidauk atinje 20%, ho nune’e iha rekrutamentu foun bele priense ona kuota.
“Rekrutamentu ba tinan ne’e ami foku liu ba operasaun iha territóriu nasionál, tanba iha Fronteira membru Polísia iha númeru oituan liu, dalabarak postu ida ema na’in-tolu de’it no katuas hotu ona, agora tenke halo renovasaun, nune’e mak ita tenke foti fali sira ne’ebé foun atu aumenta mínimu na’in-neen atu sira bele troka malu, ita tenke koloka joven iha ne’ebá atu hadi’a di’ak liután nível patrollamentu,” Ministru akresenta.
Notísia relevante : Xefe Estadu husu ekipa juri rekrutamentu PNTL foun tenke imparsiál
Ministru dehan, tuir loloos halo rekrutamentu ba kadetis foun hamutuk 500 maibé iha etapa dahuluk halo uluk rekrutamentu ba membru na’in-400 no iha etapa daruak mak halo rekrutamentu ba ofisiál na’in-100.
“Tanba ofisiál ami sei haree hela ba kestaun legál, tékniku, kurríkulu seidauk hotu, bainhira hotu mak ami halo ona rekrutamentu ba ofisiál, kona-ba ofisiál ita halo formasaun durante tinan-tolu ne’ebé mai sei haree hela,” nia tenik.
Kona-ba idade ba kadetis foun sira hahú 18-23 tanba rekrutamentu daudaun ne’e halai liu ba soldadu, ho nune’e tenke buka joven ho idade produtivu no foin termina ensinu sekundáriu.
“Ami halo analiza hotu ona, tinan 18-23 ne’e mak tinan efetivu no produtivu atubele absorve kualker ensinu Polisiál no formasaun fizíku, maibé idade 24 ba leten formasaun fíziku maka’as ruin bele naksalak, maibé ba sira idade 24 ba leten ita sei haree fali ba ofisiál,” nia tenik.
Ministru Francisco klarifika mós kona-ba kuota 20% ba jerasaun patriota no Polísia nia oan ne’e konsidera la’ós diskriminasaun.
“Ida-ne’e tratamentu espesiál maibé la’ós disriminasaun, nia jerasaun patriota mós nia komunidade nia oan, nia Polísia nia oan mós komunidade nia oan, sira ne’e timoroan, ita bolu jerasaun patriota sira tama ne’e tanba sira ne’e valór ne’ebé mak sira-nia aman sira rai hela ba sira, ita hakarak sira lori tama mós ba Polísia hodi lori tama mós sira-nia aman nia espíritu tama. Ida-ne’e mak ita halo,” Ministru katak.
Nune’e, nia garante iha prosesu rekrutamentu ne’e sei la’o ho imparsialidade no laiha manipulasaun no nia husu ba parte hotu atu tau matan mós ba prosesu rekrutamentu ne’e.
Iha parte seluk, Ministru ne’e relata mós servisu seguransa ba Prezidente Repúblika José Ramos-Horta liu-liu seguransa iha lina fronteira.
Jornalista : Hortencio Sanchez
Editora : Julia Chatarina

