DILI, 11 Agostu 2025 (TATOLI)-Ministru Defeza Kontra Almirante, Donaciano Costa Gomes Pedro Klamar Fuik, hatete komemorasaun loron Forsa Armada ba Libertasaun Nasionál Timor-Leste (FALINTIL) ba dala-50 sei akontese iha Tasi-Tolu no munisípiu hotu.
“Aniversáriu loron FALINTIL 50 ne’e kuaze hala’o iha munisípiu 14, atividade ba komemorasaun ne’e hahú 18 to’o 20 Agostu. Atividade boot ba komemorasaun ne’e sei konsentra iha Dili, Tasi-Tolu”, ministru dehan ba jornalista sira hafoin aprezenta orsamentu Ministériu Defeza nian 2026 ba Komisaun Revizaun Orsamentu iha Ministériu Finansa, segunda-ne’e.
Tema komemorasaun, nia esplika reflete ba tranformasaun FALINTIL ba F-FDTL, liuliu ba dezenvolvimentu tuir nesesidade konstrusaun Estadu defende soberania independensia.
Nia dehan, tema ne’e mós haree ba enkuadramentu, integrasaun ba kombatente sira-nia iha integrasaun ba sosiedade depoizde independénsia ne’e oinsá. Ho tema ida-ne’e husu nain ulun sira, entidade sira hodi esplika iha komemorasaun loron FALINTIL 20 Agostu ne’ebé sei halo tinan ne’e katak FALINTIL no F-FDTL ne’e forsa povu nian, povu nia oan sira mak halibur hamutuk iha ne’e i povu nia oan mak kaer kilat hasoru ita-nia inimigu sira.
“Entaun ohin loron ita komemora 50 anos, ita ko’alia ba ita nia povu sira katak valór ne’ebé mak sira fó liberta ita-nia rai ne’e mak sira-nia oan sira, agora oan sira ne’e iha ne’e, oinsá mak fó valór ba inan aman sira, ne’ebé fó ona sira-nia oan, sira-nia laen, sira-nia maun-alin sira para liberta rai-ne’e”, nia akresenta.
Nia informa, sekuénsia programa sira mak loron 19 iha misa agradesimentu, nune’e fó onra no glória ba FALINTIL sira-nia luta, fó hanoin ba jerasaun foun sira katak iha ita-nia independensia, ita iha ita-nia libertasaun. “Tanba ita-nia erói sira fó rasik sira-nia vida sosa ita-nia liberdade”.
Nia husu ba ema hotu ne’ebé mak sei moris uza liberdade ho responsabilidade tomak para Estadu ne’ebé mak harii, nasaun ne’ebé dezenvolve sai referensia ba futuru.
Notísia relevante: Komandu F-FDTL sei reforma veteranu ativu 80 iha loron FALINTIL
Jornalista : Natalino Costa
Editora : Rita Almeida
