PNTL halo ona identifikasaun ba suspeitu ho kazu hatama sigarru kaixa-912

DILI, 12 Agostu (TATOLI)-Diresaun Servisu Investigasaun Kriminál Nasionál halo ona identifikasaun ba suspeitu-ida ho inisiál AC no apreensaun ba kontentór-ida tanba deteta sigarru ho marka Marlboro kaixa 912 ne’ebé tama mai Timor-Leste ho ilegál.
“Ba kazu ne’e ami halo ona auto notísia no sei aprezenta ba Ministeriu Públika”, Diretór Diresaun Servisu Investigasaun Kriminál Nasionál, Superintendente Polísia João Belo dos Reis, ba jornalista sira iha nia servisu fatin Komandu Jerál Kaikoli, tersa-ne’e.
Suspeitu ne’ebé autoridade identifika, prezumível hanesan fasilitadór ba Timoroan sira hodi hatama sasán la tuir lei.
“Ami nafatin koordena ho Autoridade Aduaneira (AA)”, dehan nia. Koordenasaun ne’e halo ba prevensaun.
Nia haktuir Autoridade Aduneira identifika kontentór ne’ebé hatama sasán iha Portu-Tibar ho informasaun inisiál hatama fehuk-ropa sona, maibé ekipa deteta kontentór la’ós tula fehuk-ropa sona maibé sigarru ho marka Marlboro, kaixa 912.
Ho identifikasaun ne’e, nia dehan AA kontaktu imediata ba autoridade polisiál hodi halo kedas intervensaun.
Notísia relevante: PNTL Covalima halo apreensaun ba sidadaun na’in-haat hatama sigaru ilegál
Jornalista : Natalino Costa
Editora : Rita Almeida

