DILI, 13 Agostu 2025 (TATOLI)-Ministru Interiór, Francisco da Costa Guterres, hateten Governu sei konstrui eskuadra iha munisípiu sira hanesan Lautein, Ermera no Likisá, tanba Konsellu Administrasaun Fundu Infraestrutura (KAFI) aprova ona atu implementa iha tinan-ne’e.
“Tinan ida-ne’e ita hahú ona ba eskuadra tolu. Ha’u bele dehan eskuadra balun ne’ebé iha prosesu atu hahú mak eskuadra foun Loré, Hatulia B, no Loes”, Francisco hateten ba TATOLI iha nia kna’ar fatin Vila Verde, kuarta-ne’e.
Nia dehan, eskuadra ne’ebé Governu atu harii mak iha postu administrativu Loré, munisípiu Lautein, eskuadra postu administrativu Loes, munisípiu Likisá no Hatolia B, munisípiu Ermera.
Governante ne’e esplika tempu badak nia laran Ministériu Interiór mos sei aprezenta tán planu konstrusaun eskuadra tolu ba KAFI atu halo aprovasaun mak eskuadra iha Kelikai postu Matebian, Kelikai Sentru no Kelikai antigu munisípiu Baukau tanba postu sira ne’e postu foun ne’ebé foin eziste, entaun presiza eskuadra.
Enkuantu konaba orsamentu, ministru dehan la lembra montante ba konstrusaun eskuadra sira-ne’e.
Planu governu nian ba tinan oin, Francisco Guterres dehan sei konstrui eskuadra iha territóriu hodi kompleta ho uma 12 ba polísia sira atu hela. Planu seluk mak konstrui kuartél ba Komandu Munisípiu hotu no uma 50 ba polísia sira atu hela.
Kuandu akontese ona ida-ne’e, nia akresenta, komandu bele halo mudansa ba membru polísia sira. Ezemplu, kuandu membru polísia-ida husi Oekusi bele koloka fali ba munisípiu ne’ebé de’it, husi mobilizasaun ne’e bele profisionaliza liután membru sira.
“Ita tenke halo nune’e para nia (membru polísia) ema Vikeke ba Suai, nia maluk laiha ne’ebá, entaun nia sei hatudu servisu di’ak”, nia konklui.
Notísia relevante: Komandu instala Eskuadra PNTL ba postu administrativu foun rua iha Baukau
Jornalista : Natalino Costa
Editora : Rita Almeida
