DILI, 14 Agostu 2025 (TATOLI)-Ministru Interiór, Francisco da Costa Guterres, husu ba públiku depozita konfiansa tomak ba komisaun rekrutamentu membru Polísia Nasionál Timor-Leste (PNTL) foun, tanba prosesu rekrutamentu sira halo bazea ba validasaun kritériu sira.
“Kritériu ba rekrutamentu ne’e iha validasaun hotu ona mak sira halo, ne’ebé la’ós ita halo arbiru de’it”, ministru hatán ba jornalista sira hafoin partisipa serimonia aniversáriu Unidade Espesiál Polísia (UEP) ba dala-16 iha Kuartél UEP Bairru Pité, kinta-ne’e.
Materiál manuál ne’ebé komisaun utiliza durante prosesu rekrutamentu, ministru husu atu kontinua tau konfiansa ba kapasidade no servisu ne’ebé Timoroan sira halo iha selesaun ba membru polísia foun.
“Ha’u fiar polísia sira ne’e, lalika kestiona sira nia kapasidade, ita tenke fiar sira”, afirma nia hodi husu ba jornalista sira promove Timoroan sira, labele buka soke uluk Timor oan.
Notísia relevante: Rekrutamentu ba membru PNTL labele diskrimina sidadaun – PDHJ
Jornalista : Natalino Costa
Editora : Rita Almeida
