LIKISÁ, 23 Agostu 2025 (TATOLI)-Governu lansa Jornál Parede Dijitál (JPD) no ofisialmente fornese liña internet gratuita dahuluk ba eskola iha Koléjiu Santu Inacio Loiola (SCIL, sigla portugés) Kasait, munisípiu Likisá, sábadu-ne’e.
Programa ne’e hanesan polítika governu da-sia liuhusi Sekretariu Estadu Komunikasaun Sosiál hodi hasae koñesimentu ba estudante sira iha área informasaun, produtu jornalístiku dijitál.
Enkuantu liña internet atu fasilita estudante sira buka referénsia no ajuda profesór sira hanorin ho di’ak.
Liña internet sei fornese uluk ba eskola lima mak hanesan CSIL Kasait, eskola públika Nino Konis Santana iha Ermera, eskola públika 1912 Don Boaventura iha Manufahi, eskola públiku Don Martinho Lopes iha Maliana no eskola Don Bosco Fatumaka iha Baukau.
Sekretáriu Estadu Komunikasaun Sosiál, Expedito Loro Dias Ximenes, programa ne’e hanesan inovasaun iha setór edukasaun atu hakbiit koñesimentu estudante sira nian iha mundu jornalismu.
“Plataforma jornál parede dijitál ida-ne’e fó espasu ne’ebé foun no luan atu hakerek no mós bele kolabora, dezenvolve hanesan baze”, dehan iha nia intervensaun.
Membru Governu da-sia ne’e husu ba estudante sira aproveita hodi hatudu kreatividade liuhusi hakerek no dezeña, espresa hodi divulga ba eskola sira sleuk.
“Pájina sira labele husik mamuk. Ha’u mós husu ba profesór sira hanoin estudante hodi hasae sira-nia koñesimentu liuhusi jornál parede dijitál ne’ebé ita lansa ona ne’e iha avizu ruma tau iha ne’e, nune’e inan aman no estudante bele akompaña”, nia fó-hanoin.
Nia husu ba estudante sira atu aproveita internet iha prosesu aprendizajen.
Atividade ne’e servisu hamutuk ho ChildFund atu ajuda estudante, fó oportunidade hasae abilidade liuhusi hakerek no lee.
Iha fatin hanesan, Ministra Edukasaun Dulce de Jesus, hateten jornál parede dijitál nu’udar literasia dijitál hodi fasilita estudante atu hakerek no lee.
Tuir nia, kultura lee no hakerek ne’e menus iha eskola sira hotu, tanba ho plataforma jornál parede dijitál no fornesimente internet bele ajuda estudante sira abitua hodi hakerek no lee.
“Ha’u husu prienxe pájina sira ne’e ho ita-boot sira-nia talentu ne’ebé iha. Labele husik pájina sira iha jornál parede dijitál ne’e mamuk”, nia afirma.
Nia hato’o agradesimentu ba Ministériu Transporte no Komunikasaun tanba fornese internet gratuitu ba eskola sira, ho esperansa eskola hotu iha teritóriu bele hetan fasilidade ne’ebé hanesan.
Iha fatin hanesan, Ministru Transporte Komunikasaun, Miguel Miguel Marques Gonçalves Manetelu, hateten programa ne’e atu fasilita estudante sira-nia prosesu aprendizajen sai efetivu no inkluzivu.
“Internet la’os de’it fonte informasaun nian maibé instrumentu ne’ebé permite kriasaun aprendizajen foun, efetivu no inkluzivu”, katak nia.
Diretór Interinu Eskola CSIL, Padre Yoshitaka Ura, agradese ba Governu tanba bele lansa jornál parede dijitál no oferese internet gratuita dahuluk iha eskola referida.
“Ami agradese tebes tanba desde 2013, eskola ne’e iha internet ho ida-ne’e bele ajuda estudante no prosefesór sira iha prosesu aprendizajen”, nia konklui.
Notísia relevante: Eskola Koléjiu Santu Inácio de Loiola Aplika Sistema Aprendizajen Unika
Jornalista : Natalino Costa
Editora : Rita Almeida
