XINA, 23 agostu 2025 (TATOLI)-Jornalista TATOLI, I.P. na’in rua hamutuk ho reprezentante mídia hosi nasaun ASEAN seluk partisipa semináriu kona-ba dezafiu no impaktu husi plataforma intelegencia artificial (IA) ne’ebé maka organiza husi China Media Group (CMG).
Semináriu ne’e, parte ida hosi programa China Walk vibran Hainan Intervista ne’ebé maka organiza hosi CMG hodi halibur jornalista 30-resin hosi nasaun membru ASEAN. Enkuantu Timor-Leste nian partisipa hosi Jornalista Argentina Cardoso no António Daciparu.
Profesór Dianlin Huang, hosi Comunication University of China maka sai oradór hodi hato’o ninia palestra kona-ba dezafiu no oportunidade globál iha mídia sudeste aziátiku.
Nia dehan, evolusaun plataforma iha tinan 30 nia laran la’o avansadu, maibé daudaun ne’e ho prezensa plataforma AI sei fó impaktu tanba sei mosu informasaun hoax barak liu no laiha ona informasaun ne’ebé iha ninia konfidensiálidade ba públiku.
“Uluk buat hotu opera husi ema, maibé daudaun ne’e AI bele halo ida ne’e, purzemplu iha Xina iha loza balun la uza ona ema sai hanesan servente, maibé sira uza de’it robot hodi halo servisu,”nia hateten iha salaun konferénsia CMG Sanya Hainan Xina.
“Iha universidade balun tradutór sira barak ema la presiza ona tanba AI bele halo tradusaun ba lian hotu-hotu, ida ne’e sei halo ema barak lakon servisu,”nia reforsa.
Dianlin Huang, ne’e hatutan liuhosi AI sidadaun sira atu asesu informasaun ho lais no fasil liu liuliu ba ema ho ekonomia kiik sira.
Jornalista : Argentina Cardoso
Editór : Agapito dos Santos
