Jornalista 100-resin inklui husi TATOLI partisipa programa treinamentu mídia iha Beijing-Xina
DILI, 25 Agostu 2025 (TATOLI) – China International Press Communication Center (CIPCC), organiza sesaun informativa hodi hahú programa Formasaun ba Jornalista husi nasaun 90-resin ba périodu 2025 iha Kapitál Beijing, Xina.
Sesaun informativa ne’e realiza iha Sede CIPCC, lokaliza iha Diplomatic Residence Compound, Xina, sexta foin lalais.
Programa ho durasaun fulan-haat ne’ebé hahú ohin, loron Segunda, 25 Agostu to Dezembru. Programa ne’e halibur jornalista 100-resin husi nasaun oi-oin, inklui nasaun sira iha Áfrika, Amerika Latina, Eurazia, Azia-pasífiku, Europeiu Sentrál no Leste no mos nasaun Arabika sira.
Entretantu, hola parte iha progama formasaun ne’e inklui mós jornalista sira husi rejiaun Sudeste Aziátiku, inklui Timor-Leste, Indonézia, Laos, Tailándia, Malázia, Myanmar, no seluktan.
Formasaun fulan-haat ne’e sei foku liu ba hasa’e ablidade jornalístika, dezenvolvimentu media iha Xina, nune’e mos polítika, kultura, sosioekonomika no teknolojia.
Iha biban ne’e, jornalista sira mós sei hetan oportunidade hodi hola parte iha programa interkámbiu media no viajen ba provínsia sira fora husi sidade Beijing.
Diretór Jeral CIPCC, Yu Lei enkoraja partisipante sira atu uza oportunidade ne’e ho másimu atu bele aprende buat foun hodi bele kontribui ba dezenvolvimentu nasionál iha sira-nia nasaun.
Nia dehan, formasaun ne’e importante tebes tanba jornalista sira la’ós de’it aprende kona-ba media no jornalizmu maibé fó mós espasu no tempu atu sira komunika no halo interrasaun ho komunidade lokál.
Asistente CIPCC, Yao Baike akresenta katak dezde 2014, CIPCC sai hanesan ponte ida hodi kria koneksaun entre jornalista internasionál ho sosiedade xineza.
“Jornalista internasionál hamutuk na’in-700 resin husi nasaun oi-oin mak partisipa ona iha programa ne’e. Sira prodús ona notísia no reportajen rihun ba rihun hodi ajuda ema barak iha mundu koñese no komprende kona-ba Xina Kontemporanea,” nia esplika.
Jornalista Indonéziu, Doan Widhiandono husi media Hariandisway espresa ninia gratidaun tanba bele hetan oportunidade hodi partisipa no aprende hamutuk ho jornalista husi rai barak.
“Ha’u espera katak formasaun ida ne’e sei hametin liutan relasaun entre Xina ho Indonezia, nune’e mós nasaun seluk, inklui Timor-Leste,” nia haktuir.
Iha biban ne’e, Jornalista Abu Bakarr Bah husi Serra Leoa haktuir, nia apresia ho programa CIPCC nian tanba bele halibur jornalista ho nasionalidade oi-oin.
“Ha’u hasoru ona jornalista husi kontinente oi-oin. Entaun, ha’u hanoin, programa ne’e buat ida-ne’ebé kapás tebes. Espera katak durante fulan-haat nia laran, ha’u bele esplora no aprende buat barak liuhusi interkámbiu kultural entre Xina, Áfrika, Ázia, Amerika Latina, Eurazia, Arabia no seluk” nia espresa.
Husi Timor-Leste, jornalista na’in tolu mak partisipa ona iha programa referidu, inklui ida husi GMN, ida husi Timor Post no Filomeno Martins husi TATOLI, I.P.
Dezde 2014, prorgrama referidu halibur ona jornalista atus-ba-atus no lori impaktu pozitivu ba sira-nia nasaun, iha ne’ebé, sira kontribui, dezenvolve no hasa’e kualidade produtu jornalístiku nune’e mós hametin relasaun di’ak ho Xina.
Jornalista: Filomeno Martins
Editor: Rafael de Ximenes de A. Belo
