Uma-kain ualu hamamuk ona arredór Eskola EB 03 Akadiru-hun
DILI, 25 Agostu 2025 (TATOLI)–Diretór Servisu Munisipál Jestaun Merkadu no Turizmu iha Autoridade Munisipiu Dili, Arthur Henriques, informa, uma-kain ualu ne’ebé okupa resintu Eskola Ensinu Báziku (EB) 03 Bidau Akadiru-hun.
“Ohin halo eviksaun ba fatin ida-ne’e, sobu uma-kain ualu iha Ensinu Báziku 03 Bidau Akadiru-hun,” hato’o iha resintu Eskola EB Bidau Akadiru-hun, Segunda ne’e.
Tuir Diretór, okupante sira koopera tebes ho Estadu hodi ekipa Jestaun Merkadu munisípiu Dili halais nia prosesu rekolla dadus.
“Prosesu ami hala’o ne’e halo diálogu entre Autoridade lokál, Administradór postu Na’in-Feto, no Diretór Eskola inklui Diretór Edukasaun munisípiu ho Seguransa sira. Okupante koopera tebes maibé situasaun mak ne’e ita-nia okupante presiza apoiu transporte hodi transporta sasán bá munisípiu. Aleinde ne’e, sira mós hetan apoiu umanitáriu husi Ministériu Solidariedade Sosiál no Inkluzaun foos no hahán seluk,” nia akresenta.
Nune’e, ohin ne’e ekipa Jestaun konsege rejista uma-kain rua ne’ebé hakarak desloka bá nia moris fatin iha munisípiu seluk.
“Ida bá Baukau no ida ba Lautein maibé Lautein no família sira seluk ne’e muda nafatin iha Dili laran,” nia katak.
Notísia relevante : ME fó karta notifikasaun bazeia ba númeru okupante iha arredór eskola
Okupante sira-ne’e la hetan indeminizasaun tanba okupa arredór eskola. Okupante sira ne’e hela momentu krize polítika 2006 ne’e, ne’ebé maioria husi sira hanesan profesór.
Diretór Servisu Jestaun munisipál Dili, hatutan fó karta notifikasaun ba sira-ne’e liuhusi Ministériu Edukasaun (ME) iha loron 15 Jullu no to’o ohin uma-kain sira ne’ebé okupa koopera no hamamuk fatin.
ME liuhusi Diresaun Servisu Edukasaun Munisípiu, Sabino Soares Pereira, hateten, sei hasai okupante sira fazeadamente la’ós notifika dala-ida.
“Kona-ba programa Governu nian, liuliu atu hasai okupante husi arredór eskola ne’e, ami kontinua hala’o hanesan daudaun ami fó karta notifikasaun, maibé fazeadamente. Ami fó uluk ba okupante resintu eskola neʼebé númeru boot, nune’e tun ba okupante ne’ebé ho uma-kain oituan,” nia akresenta.
Diretór konsidera atu garante kualidade edukasaun ba estudante sira, komunidade tenke kontribui hodi fó espasu ba eskola hodi hala’o prosesu aprendizajen.
“Ami hakarak garante kualidade edukasaun ba estudante sira, ne’ebé ami sei hasai komunidade husi resintu eskola atu estudante bele iha ensinu liberdade ba asesu prosesu aprendizajen iha eskola,” nia katak.
Jornalista : Osória Marques
Editora : Julia Chatarina
