MOP-IGEADI planeia sei hasai sedimentasaun iha mota-drainajen iha Dili
DILI, 19 Setembru 2025 (TATOLI)—Ministériu Obra Públika (MOP) no Institutu Jestaun Ekipamentu Apoiu Dezenvolvimentu Infraestrutura, Institutu Públiku (IGEADI, I.P) planeia iha Outobru nia laran ne’e sei halo normalizasaun ka hasai sedimentasaun sira iha mota-laran inklui drainajen sira-ne’ebé sai tendénsia ba problema inundasaun iha sidade Dili.
Hanesan ita hotu hatene katak hahú husi fulan outubru to’o komesa ona tempu udan (bailaok) no iha tempu udan sempre mosu inundasaun boot iha sidade Dili hodi hamosu estraga ba komunidade sira-nia uma no mós akontese bee intupidu iha estrada laran, satán daudaun ne’e mós sedimentasaun (rai-henek) barak nakonu iha mota laran.
“Agora seidauk maibé bazeia ba ami-nia kalendáriu iha fulan-outobru ami sei halo normalizasaun ba mota sira-ne’ebé mak sai tendénsia ba inundasaun tanba ita haree katak sedimentasaun sei barak iha mota-laran, nune’e bele alerta bee ba komunidade nia hela fatin,” Ministru Obra Públika, Samuel marcal, informa ba Agência Tatoli liuhusi telefónika, ohin.
Governante ne’e dehan, ba atividade hasai sedimentasaun ne’e nia parte koordena ona ho Institutu Jestaun Ekipamentu Apoiu Dezenvolvimentu Infraestrutura, Institutu Públiku (IGEADI, I.P) atu dezentraliza tiha ekipamentu iha Outobru nia laran ba mota sira.
“Ho nune’e, bainhira to’o tempu udan boot mai no volume bee maka’as karik, ita bele proteje ona inundasaun iha Dili laran,” nia hateten.
Iha sorin seluk. Prezidente Institutu Jestaun Ekipamentu, Ana Paula da Cruz, informa loos duni antes ne’e Ministériu Obra Públika koordena ona atu halo normalizasaun ba área mota laran ne’ebé baibain sempre akontese inundasaun, nune’e ekipa téknika IGEADI nian halo ona levantamentu dadus.
“Husi levantamentu dadus ne’e identifika katak fatin ne’ebé sai alvu ba normalizasaun durante fulan-Outobru nia laran ne’e mak iha área Dili laran, entaun ami sei destaka mós ekipamentu hanesan eskavatór no kamioneta tula rai henek nian,” prezidente ne’e hateten.
Jornalista : Alexandra da Costa
Editór : Cancio Ximenes
