DILI, 26 Setembru 2025 (TATOLI) – Prezidente Repúblika José Ramos-Horta, sesta ne’e, iha Palásiu Prezidensiál, Prezidente Nicolau Lobato Dili simu vizita husi Embaxadór Olanda naun rezidente Marc Gerritsen hodi ko’alia kona-ba dezenvolvimentu ekonómiku entre nasaun rua.
“Ami ko’alia kona-ba dezenvolvimentu ekonómiku, komérsiu, no ami hakarak duni atu serbisu hodi hasa’e komérsiu entre Sudeste Aziátiku, inklui Timor-Leste, no Europa, tanba rejiaun rua ne’e bele duni hetan benefísiu husi komérsiu barak liután entre rejiaun rua ne’e,” Embaxadór ne’e hateten ba jornalista sira hafoin ramata enkontru Xefe Estadu.
Diplomata Olandes ne’e dehan, Prezidente Ramos-Horta nu’udar belun boot Europa nian, ho nune’e sira hakarak retribui fali amizade ne’e hodi iha ligasaun no ajuda Timor-Leste atu dezenvolve liután setór ekonomia.
“Ha’u hala’o enkontru di’ak tebes ho Prezidente Ramos-Horta kona-ba dezenvolvimentu atuál iha ne’e. Ha’u fó parabéns ba Prezidente kona-ba adezaun Timor-Leste nian ba ASEAN. Ha’u hanoin ne’e pasu boot ida no dezenvolvimentu ida-ne’ebé di’ak tebes, la’ós de’it ba Timor-Leste, maibé mós ba rejiaun,” nia dehan.
Embaxadór ne’e hatutan, relasaun entre Timor-Leste ho Olanda eselente tebes no Olanda haree Timor-Leste tane aas duni valór demokrasia no direitu umanu.
Iha okazaiun ne’e, parte rua ko’alia mós kona-ba relasaun bilatareál entre país ne’ebé restaura nia independénsia iha tinan-2002 ho país Europa – Olanda, koñesidu nu’udar ‘País dos Moinhos de Vento’ ne’e, atu hametin liután iha futuru hodi tulun malu iha área saida de’it ba interrese nasaun rua nian.
“Relasaun bilaterál maka halo ita besik liután no haburas ita-nia relasaun sira. Lakle’ur tan ami sei konvida joven jornalista ida husi Timor atu ba Olanda hodi hala’o vizita estudu ida,” nia promete.
Iha enkontru ne’e, Ramos-Horta mós husu ba Olanda atu apoia nafatin nasaun úniku iha Sudezte-Áziatiku ho lian ofisiál portugés ne’e, bainhira presiza, tanba iha fulan-outubru ne’e adere ona iha organizasaun rejionál – ASEAN, nu’udar membru ho diretu plenu.
Jornalista: Hortencio Sanchez
Editór: Rafael Ximenes de A. Belo
