Eventu kulturál no merkadu kalan hametin relasaun Indonézia ho Timor-Leste
DILI, 27 Setembru 2025 (TATOLI)–Embaxada Indonézia iha Timor-Leste, realiza eventu kulturál no merkadu kalan hodi komemora loron Proklamasaun Indonézia ba dala-80, Sábadu ne’e, iha Timor Plaza, hodi hametin relasaun entre país rua.
Selebrasaun ne’e ho tema “Hametin Lasu Kulturál no Ekonómiku ho Timor-Leste ba Integrasaun ASEAN, Pás no Armónia,” hanesan momentu ida hodi hametin relasaun kulturál no ekonómika entre Indonézia ho Timor-Leste no apoia Timor-Leste nia adezaun tomak ba Asosiasaun Nasaun Sudeste Aziátiku (ASEAN-sigla ingleza) iha fulan-Outubru mai ne’e.
Notísiarelevante: https://tatoli.tl/2025/09/26/hein-tau-fotohametin-fraternidade-kbri-konvida-komunidade-dili-partisipa-loron-indonezia/
Eventu ne’e halo abertura ofisialmente husi Embaxadór Indonézia ba Timor-Leste, Okto Dorinus Manik, Prezidente Repúblika, José Ramos-Horta, membru Nonu Governu Konstituisionál balun, reprezentante korpu diplomátiku ho entidade sira seluk.
Iha intervensaun, Okto Dorinus hateten katak relasaun Indonézia no Timor-Leste la’ós de’it bazeia ba besik jeográfika maibé mós relasaun emosionál no istórika ne’ebé forte.
“Timor-Leste barak aprende, servisu no iha família iha Indonézia. Ne’e ami la’ós de’it viziñu, maibé ami família,” nia hato’o.
Diplomata ne’e hateten eventu referidu hala’o papél importante ida hodi hametin ekonomia lokál iha Timor-Leste inklui kontribuisaun husi empreza sira husi Indonézia ne’ebé hala’o operasaun iha país ne’e partisipa mós iha merkadu kalan hanesan Pertamina Internasionál, Banku Mandiri, Telekomsel, Bank Rakyat Indonesia (BRI) no seluk tan.
Iha fatin hanesan, Prezidente Repúblika, José Ramos-Horta, apresia inisiativa ne’e hodi hametin relasaun país rua.
“Ita-nia relasaun forte, la’ós de’it entre Governu, maibé mós entre povu sira. Relasaun di’akliu iha área komérsiu, edukasaun, kultura no turizmu,” nia dehan.
Komemorasaun loron Indonézia 2025, hatudu atuasaun arte nian, múzika, dansa tradisionál no kolaborasaun sira husi artista Nasaun rua.
Notavelmente, múziku koñesidu sira hanesan Jacson Seran no Fresly Nikijuluw husi Indonézia no Jessie Lopez husi Timor-Leste enfeita palku hanesan símbolu amizade nian.
Aleinde ne’e, stand kulinária, moda no produtu kriativu inklui kontribuisaun husi empreza sira husi Indonézia ne’ebé hala’o operasaun iha Timor-Leste iha merkadu kalan nian.
Momentu inspirasaun ida iha kalan ne’e mak prezensa joven Mariano Ameta da Costa Alves, na’in ba Kafé Atsabe, ne’ebé fahe nia susesu ho jerasaun foinsa’e Timor-Leste nian hanesan forma aten-barani atu hahú servisu no kontribui ba Nasaun.
Eventu ida-ne’e nu’udár símbolu reál ba amizade kulturál ne’ebé besik maibé mós hametin pozisaun Indonézia nian hodi apoia prosesu integrasaun Timor-Leste nian hanesan membru ASEAN.
Eventu ne’e hetan partisipasaun husi sidadaun lokál no komunidade internasionál
Jornalista: Nelson de Sousa
Editór: Xisto Freitas Piedade
