La konkorda harii estádiu iha Tasi-Tolu, Ministru Nelyo husu Igreja submete karta ofisiál ba Governu
DILI, 02 Outubru 2025 (TATOLI)—Ministru Juventude Desportu, Arte no Kultura, Nelyo Isaac Sarmento solisita Igreja atu submete karta ofisiál ba Xefe Governu, Xanana Gusmão, kona-ba razaun la konkorda harii estádiu foun iha Tasi-Tolu.
Ministru hateten ida-ne’e relasiona ho preokupasaun husi Prezidente Konferénsia Espiskopál Timorense (CET-sigla portugeza), Don Norbeto do Amaral no Arsebispu Akedioseze Metropolitana Dili, Don Virgílio Kardeál do Carmo da Silva, kona-ba atu harii estádiu foun iha Tasi-Tolu ne’ebé konsideradu sei halakon sítiu istóriku ne’ebé iha.
“Governu rejistu preokupasaun públiku nian, inklui Konferénsia Espiskopál Timorense nia hanoin, liuliu Bispu na’in-tolu. Ha’u fó hanoin di’akliu Prezidente Espiskopál Timorense bele haruka karta ofisiál ba Xefe Governu para espresa hanoin ruma tanbasá mak husi parte sira-nian lakohi harii estádiu iha-ne’ebá, nune’e iha opsaun seluk karik Governu bele haree hodi harii estádiu, maibé to’o agora saida mak Governu deside iha Tasi-Tolu la’o tuir ida-ne’e,” Ministru dehan ba jornalista sira iha Palásiu Governu, Kuarta ne’e.
Notísia relevante: Don Norberto la konkorda harii estádiu iha Tasi-Tolu
Antes ne’e, Prezidente Konferénsia Espiskopál Timorense no Bispu Dioseze Maliana, Don Norberto do Amaral la konkorda ho polítika Governu ne’ebé atu harii estádiu foun iha Tasi-Tolu, tanba sei halakon sítiu istóriku tolu neʼebé importante.
“Ha’u-nia hanoin mak lalika konstrui estádiu iha-ne’ebá, tanba sei destroi istória tolu importante ne’ebé eziste iha-ne’ebá kompostu husi fatin restaurasaun independénsia RDTL, fatin vizitasaun Amu-Papa João Paulo II no vizita Amu-Papa Francisco nian,” nia dehan.
Don Norberto akresenta Tasi-Tolu sai ona hanesan fatin sagradu, ne’ebé hatudu identidade nu’udár nasaun independente ida.
“Ita hatene katak fatin Tasi-Tolu sai ona hanesan fatin sagrada ida, neʼebé ita hatudu ona identidade nu’udár nasaun ida. Entaun, ita presiza mantein identidade ne’e,” Don Norberto enfatiza.
Jornalista: Osória Marques
Editór: Xisto Freitas da Piedade
